О́tken demalys kúnderi fýtboldan 2023 jylǵy el chempıonatynyń shymyldyǵy túrildi. Elimizdiń bes qalasynda uıymdastyrylǵan I týr oıyndary dańqty fýtbolshy jáne bapkeri Tımýr Segizbaevtyń qurmetine arnaldy.
Tımýr Sanjarulynyń esimi elimizdiń fýtbol jankúıerlerine jaqsy tanys. Fýtbolshy retinde Segizbaev 19 jasynda KSRO chempıonatynda debıýt jasap, «Qaırat» sapynda óner kórsetti. 1963 jyly Odaq kýboginiń jartylaı fınalyna shyqqany úshin «KSRO sport sheberi» ataǵyn aldy. 6 jyl qatarynan «Qaırattyń» kapıtany boldy. Mansabyn aıaqtaǵannan keıin «Avtomobılıst» (Qyzylorda), «Shahter» (Qaraǵandy), «Qaırat» (Almaty), «Melıorator» (Qyzylorda) komandalary men Iemen quramasynda bapker retinde qyzmet etti. 1989 jyldan 2001 jylǵa deıin elimizdiń fýtbol federasııasynyń vıse-prezıdenti, bas hatshysy jáne prezıdenti qyzmetin atqardy.
Bıylǵy chempıonattyń tusaýy Shymkenttegi Qajymuqan atyndaǵy ortalyq stadıonda kesildi. Byltyr Qazaqstan kýboginde jeńimpaz atanǵan jergilikti «Ordabasy» klýby alǵashqy týrda Aqtaýdyń «Kaspııin» qabyldap, óz jankúıerleriniń aldynda qonaqtardy iri eseppen tize búktirdi – 3:1.
Shymkenttik klýb qysqy transfer kezeńinde belsendi jumys istep, quramyn ulttyq qurama sapynda dop tebetin bedeldi oıynshylarmen tolyqtyrdy. Atap aıtqanda, bıylǵy maýsymda «Ordabasy» klýbynyń namysyn el quramasynyń kapıtany Ashat Taǵybergen, qorǵaýshylar – Sergeı Malyı, Temirlan Erlanov, jartylaı qorǵaýshy Baýyrjan Islamhan, taǵy basqa Qazaqstannyń jáne sheteldiń eń myqty degen fýtbolshylary qorǵaıdy.
«Kaspıımen» ótken matchta alań qojaıyndarynyń soqqan úsh golyn da maýsymaralyq úziliste komanda quramyn tolyqtyrǵan oıynshylar soǵyp, «Ordabasyǵa» jeńis syılady. Máselen, kezdesýdiń esebin 16-mınýtta eki jyldyq úzilisten keıin úlken fýtbolǵa oralǵan Baýyrjan Islamhan ashyp qana qoımaı, jańa maýsymdaǵy birinshi goldyń avtory atandy. Bıylǵy qazaq fýtbolyndaǵy eń iri jańalyqtyń biri – Islamhannyń jasyl alańǵa qaıta oralýy desek, artyq aıtqandyq bolmas. Ekinshi taımnyń 49-mınýtynda Ashat Taǵybergen esepti eseleı tússe, keıinnen «Ordabasynyń» ózbekstandyq shabýylshysy Bobýr Abýholıkov tablodaǵy esepti 3:0-ge jetkizdi. Qonaqtar sapynan qarymta goldy 71-mınýtta Georgıı Pansýlaıa soqty.
4 naýryzǵa josparlanǵan birinshi týrdyń ekinshi matchynda joǵary lıgaǵa qaıta oralǵan Taldyqorǵannyń «Jetisý» klýby byltyrǵy el birinshiliginiń kúmis júldegeri «Aqtóbeni» qabyldap, teń dárejede ótken oıynda bir dop aıyrmasymen jeńilip qaldy. Almatydaǵy «Jas Qyran» stadıonyndaǵy kezdesý 1:0 esebimen qonaqtardyń paıdasyna sheshildi. Oıyndaǵy jalǵyz ári jeńis golyn 83-mınýtta Qazaqstan quramasynyń shabýylshysy Maksım Samorodov soqty.
2022 jylǵy maýsymnyń qola júldegeri atanǵan «Tobyl» da bıylǵy chempıonatty jeńispen bastady. Birinshi týrda Pavlodardyń «Aqsýyn» qabyldaǵan qostanaılyqtar esh qıyndyqsyz alǵashqy úsh upaıyn oljalady – 3:1. Matchtyń esebin 9-mınýtta alań ıelerinen Mılan Výkadınovıch ashsa, 59-mınýtta Islam Chesnokov esepti eseleı tústi. 66-shy mınýtta qonaqtar sapynan Tonı Sılva esep aıyrmasyn qysqartqanymen, qosymsha ýaqytta Serj Deble oıynnyń núktesin qoıdy.
Birinshi týrdyń birinshi kúnine josparlanǵan sońǵy matchta byltyrǵy el chempıony, bıylǵy sýperkýbok ıegeri «Astana» men Qaraǵandynyń «Shahteri» sheberlik baıqasty. «Astana Arena» stadıonyna jınalǵan jankúıerler asa tartysty matchtyń kýási boldy. Úsh gol soǵylǵan básekede «Astana» fýtbolshylarynyń asyǵy alshysynan tústi – 2:1. 3-mınýtta elordalyq klýbtan Vladıslav Prokopenko dáldik tanytsa, arada 20 mınýt ótkende bıylǵy chempıonattyń eń qundy fýtbolshysynyń biri sanalǵan Dembo Darbo el chempıonatyndaǵy alǵashqy golyn soǵyp, alań ıeleriniń basymdyǵyn eseleı tústi – 2:0. Birinshi taım aıaqtalǵanǵa deıin qonaqtar sapynan Shyńǵys Flıýk mergendigimen kózge túsip, esep aıyrmasyn qysqartyp úlgerdi. Ekinshi taımda «kenshiler» komandasy tarazy basyn teńestirýge tyrysqanymen, «Astana» qaqpasynan sańylaý taba almady.
Sonymen qatar keshe Shymkentte «Maqtaaral» Kókshetaýdyń «Oqjetpesin», Almatyda «Qaırat» Atyraýdyń «Atyraýyn» qabyldasa, joǵary topqa oralǵan «Qaısar» Qyzylordada «Qyzyljar» komandasymen úsh upaıdy sarapqa saldy.