Keıingi jyldary elimizde úlken fýtbolǵa qaraǵanda, shapshańdyqty talap etetin shaǵyn fýtbol qarqyndy damyp keledi. Bul sózimizge fýtzal quramasynyń osydan eki jyl buryn Lıtvada uıymdastyrylǵan álemdik dodadaǵy joǵary jetistigi men byltyr Nıderlandta jalaýy jelbiregen Eýropa birinshiligindegi tabysty óneri dálel bola alady.
Kúni keshe Rıkardo Kaka bastaǵan fýtzaldan el ulttyq quramasy kelesi jylǵy álem chempıonatyna joldama beretin negizgi irikteý kezeńindegi sońǵy matchyn ótkizip, syrt alańda Slovenııa fýtzalshylarymen teń tústi. Toptaǵy tórt oıynnyń úsheýinde jeńiske jetip, bireýinde upaı bólisýge májbúr bolǵan jerlesterimiz birinshi orynmen irikteýdiń kelesi aınalymyna, ıaǵnı elıtaly kezeńge joldama aldy.
Marıbor qalasynda ornalasqan «Dvorona Tabor» sport keshenindegi tartysty báseke 3:3 esebimen teń aıaqtaldy. Qazaqstan quramasy kelesi kezeńniń máselesin merziminen buryn sheship qoıǵan soń, bul kezdesýde baryn salyp oınaǵan joq. Sonymen qatar jaraqattaryna baılanysty atalǵan matchta qaqpashy Igıta men qorǵaýshy Leo ulttyq quramaǵa kómektese almady.
Match barysynda ulttyq qurama sapynan Albert Aqbalyqov (5-mınýt), Dáýren Tursaǵulov (15) jáne Taınan (19) mergendigimen kózge tússe, alań ıelerinen Jıgo Cheh (9), Igor Osredkar (25) jáne Teo Týrk (26) dáldik tanytty. Osylaısha, el quramasy tórt matchta 10 upaı jınap, ekinshi irikteý kezeńin óz tobynda birinshi orynmen aıaqtady. Buǵan deıin bizdiń jigitter Slovenııany 2:0, Chernogorııa quramasyn 5:1 jáne 7:0 esepterimen tize búktirgen bolatyn. Jerlesterimiz besinshi topta óner kórsetti.
Endi Rıkardo Kaka shákirtteri Eýropa chempıonatynyń fınaldyq kezeńine joldama alý úshin elıtaly kezeńde baq synaıdy. Qazaqstan quramasynan bólek, Ispanııa (birinshi toptyń jeńimpazy), Grýzııa (2-top), Armenııa (3-top), Portýgalııa (4-top), Polsha (6-top), Horvatııa (7-top), Rýmynııa (8-top), Fransııa (9-top), Italııa (10-top), Ýkraına (11-top) jáne Slovakııa (12-top) quramalary da elıtaly kezeńde oınaıdy. Sonymen qatar ekinshi irikteý kezeńinde ekinshi oryn alǵan quramalar ishinde eń kóp upaı jınaǵan taǵy tórt komanda elıtaly kezeńge joldama aldy. Olar: Serbııa (9-top), Slovenııa (5-top), Fınlıandııa (8-top) jáne Ázerbaıjan (6-top).
Al az upaımen ekinshi orynǵa taban tiregen Belgııa, Majarstan, Germanııa, Lıtva, Moldova, Nıderland, Chehııa, Shvesııa quramalary 10-19 sáýir aralyǵynda bir-birimen qosymsha ótkizedi. Jeńiske jetken ujym kelesi kezeńde oınaý múmkindigine ıe bolady.
20 qurama qatysatyn elıtaly kezeńniń jerebesi 5 shildede tartylady. Al matchtar 2023 jyldyń jeltoqsanyna josparlanǵan.