Belgili zańger Oleg Chernov pen onyń áıelin Dáýlet Turlyhanovtyń ulymen tóbeles boıynsha sot-medısınalyq saraptamalar taǵaıyndaldy. Bul týraly Bas áskerı prokýratýra málimdedi, dep habarlaıdy Egemen.kz Tengrinews.kz saıtyna silteme jasap.
«Sotqa deıingi tergep-tekserý aıasynda sot-medısınalyq saraptamalar taǵaıyndalyp, qadaǵalaýshy prokýror oqıǵanyń barlyq mán-jaıyn anyqtaýǵa jazbasha nusqaý berdi», dep habarlady Bas áskerı prokýratýra.
Vedomstvoda Dáýlet Turlyhanovtyń ulyna qatysty istiń jaı-japsary da aıtyldy. Áskerı prokýratýra usynǵan málimetke qaraǵanda, 11 aqpanǵa qaraǵan túni Almatydaǵy Ál-Farabı dańǵylynda oıyn-saýyq oryndarynyń biriniń mańynda Qorǵanys mınıstrligine qarasty 30212 áskerı bóliminiń áskerı qyzmetshisi demalysta júrgen qatardaǵy Bolat N.D. men azamat Oleg Chernov arasynda janjal shyqqan.
«Janjal kezinde Bolat Chernov pen onyń áıeli Chernovaǵa birneshe soqqy jasaǵan. Bıyl 11 aqpanynda osy fakt boıynsha Almaty qalalyq Polısııa departamentiniń Bostandyq aýdandyq Polısııa bólimi Bolatqa qatysty Qazaqstan Respýblıkasy Qylmystyq kodeksiniń 293-baby 1-bóligi «Buzaqylyq» boıynsha sotaldy tergeý amaldaryn tirkedi. Keıinnen Bolat áskerı qyzmetker bolǵandyqtan, qylmystyq is Almaty oblystyq garnızony Áskerı polısııa basqarmasy qaraýyna berildi», dedi Bas áskerı prokýratýra ókilderi.
Eske salaıyq, buǵan deıin Almatyda áskerı qyzmetker belgili zańgerdi soqqyǵa jyqqany habarlanǵan edi.
Bul oqıǵa týraly zańger Oleg Chernovtyń áıeli Anna Dımıtrıevıch Facebook-paraqshasynda jazǵan. Olar taksıge otyra bergende bir jigit júgirip kelip, soqqyǵa jyǵylǵan qyzǵa kómektesýin suraǵan. Almaty PD bul derek QR Qylmystyq kodekstiń 293-baby «Buzaqylyq» boıynsha sotaldy tergeýdiń biryńǵaı tizilimine tirkelgenin habarlaıdy. Qylmystyq is boıynsha alǵashqy tergeý áreketteri júrgizilip, saraptamalar taǵaıyndalǵan.