Bul týraly Memleket basshysy Premer-mınıstrdiń, memlekettik organdar basshylarynyń, oblystar men Astana, Almaty, Shymkent qalalary ákimderiniń qatysýymen ótkizgen keńeste aıtty, dep habarlaıdy Egemen.kz.
«Jan-jaqty jańǵyrý úderisin bastadyq. Onyń baǵyt-baǵdaryn byltyr naýryz aıyndaǵy Joldaýda aıqyndap aldyq. Elimiz damýdyń jańa kezeńine qadam basty. Bir jyldyń ishinde aýqymdy reformalardy júzege asyrdyq. Bılik júıesin jańa talapqa saı jańǵyrtý úshin birneshe saıası naýqan ótkizdik. Mańyzdy máselelerdi talqylaý úshin Ulttyq quryltaıdy qurdyq. Memlekettigimizdiń tuǵyryn jáne el birligin nyǵaıtatyn jańa ıdeologııalyq tujyrymdar usyndyq. Naýryz meıramyn jańasha atap óte bastadyq. Respýblıka kúnin qaıta jańǵyrtý tarıhı qadam boldy», dep atap ótti Prezıdent.
Memleket basshysynyń aıtýynsha, elimizdegi túbegeıli ózgerister jaıly el ishinde ǵana emes, alys shetelde de aıtylyp jatyr.
«Bizdiń bolashaǵymyz – aıqyn, naqty josparymyz bar. Májilis jáne máslıhattar saılaýy – bılik ınstıtýttaryn jańartý jumysynyń qorytyndy kezeńi. Osylaısha, bılik jan-jaqty reformalardy jalǵastyrý úshin jańa senim mandatyna ıe bolady. Elimizdi damytý jolynda tyń bastamalar kóterip, ony tabysty júzege asyrý – basty mindet. Qazir jetistikke máz bolyp otyratyn zaman emes. Jumysty tyń qarqynmen jalǵastyrý qajet», dep naqtylady Qasym-Jomart Kemeluly.