Elimizde qysqy sport túrleriniń damý qarqyny kóńil qýantarlyqtaı jaǵdaıda emes. Búginde tek short-trek pen konkımen júgirý sportynda ǵana birshama tabysymyz bar dep aıtýǵa bolady. Oǵan jerlesterimizdiń Álem kýbogi kezeńderinde aragidik úzdikter qatarynan kórinip, el qorjynyna júlde salyp júrgeni dálel bola alady. Sondaı-aq keıingi jyldary bıatlon sportynda ilgerileý baıqalady. Sonyń aıǵaǵy retinde jýyrda Shýchınskide tuńǵysh ret bıatlonnan jasóspirimder men jastar arasyndaǵy álem chempıonaty uıymdastyryldy.
Shýchınsk qalasyndaǵy qysqy sport túrleri boıynsha Olımpıadalyq daıarlaý ortalyǵynyń bazasynda ótken jarysqa jer-jahannyń 39 elinen kelgen 600-ge jýyq sportshy qatysyp, bir aptaǵa jalǵasqan álemdik dodada 18 júlde jıyntyǵyn sarapqa saldy. Bıatlon jarystarynyń kóshbasshysy sanalatyn Germanııa sportshylary básekeniń alǵashqy kúninen bastap jarys tizginin óz qoldaryna alyp, jahandyq saıystyń sońyna deıin jalpykomandalyq esepte eshkimge des bergen joq.
Máselen, Olımpııa oıyndarynyń jeńimpazy, Álem kýbogi jarystarynyń birneshe dúrkin chempıondary Arnd Paıffer men Magdalena Noınerdiń izbasarlary toǵyz qashyqtyq boıynsha oq boıy ozyq shyqty. Atap aıtqanda, jasóspirimder arasyndaǵy uldar saıysynda Bendjamın Mens 15 shaqyrymǵa jekeleı jarysta álem chempıony atansa, qyzdar básekesinde Selına Grotıan 7,5 shaqyrymdyq sprıntte jáne 10 shaqyrymǵa iz kesýde máre syzyǵyn birinshi kesti. Sonymen qatar Germanııanyń jasóspirim qyzdar quramasy estafetada top jarsa, aralas estafetada Fransııa jáne Norvegııa sportshylaryn artqa tastap, altynnan alqa taqty.
Al jastar arasyndaǵy jarysta Germanııanyń erler quramasy úzdikter qatarynan kórine almasa da, qyzdary barlyq qashyqtyq boıynsha jeńimpaz atandy. Iýlııa Kınk 10 shaqyrymǵa jekeleı jarysta tuǵyrdyń eń bıik satysynan kórinse, Iýlııa Tannhaımer 6 shaqyrymdyq sprınt pen 7,5 shaqyrymdyq iz kesýde aldyna jan salmady. Estafeta saıysynda da nemis qyzdarynyń baǵy jandy.
Osylaısha, jasóspirimder men jastar arasyndaǵy álem chempıonatynda 9 altyn, 6 kúmis medal jeńip alǵan Germanııa bıatlonshylary jalpykomandalyq esepte birinshi boldy. Ekinshi orynǵa 5 altyn, 3 kúmis jáne 9 qola medal oljalaǵan dańqty Ýle-Eınar Bıorndalenniń otandastary jaıǵassa, úshinshi oryndy bir-birden altyn júldeni qorjynǵa salǵan Chehııa, Jańa Zelandııa, Slovenııa jáne Slovakııa sportshylary túıindedi. Jalpy, álem chempıonatynda 15 eldiń sportshylary júldegerler qatarynan kórindi.
Al Qazaqstan sportshylarynan eń úzdik nátıjege jasóspirimder arasynda synǵa túsken Danıl Chervenko qol jetkizdi. Ol 15 shaqyrymǵa jalǵasqan jarysta máre syzyǵyn 41 mınýt 58 sekýnd ishinde kesip, 11-orynǵa jaıǵasty. Jerlesimiz tórt oq atý aılaǵynda bir márte ǵana múlt ketip, jeńimpaz Bendjamın Mensten 1 mınýt 45 sekýndqa qalyp qoıdy. Al qyzdar saıysynda eń úzdik nátıjeni Mılana Geneva tirkedi. Ol jastar arasyndaǵy 7,5 shaqyrymdyq iz kesýde márege 15-shi bolyp jetti. Onyń ýaqyt kórsetkishi – 29 mınýt, 31 sekýnd. Nysana kózdeý sátinde úsh márte múlt ketti.