Argentına quramasy jáne «PSJ» komandasynyń shabýylshysy Lıonel Messı óz mansabyndaǵy 800-inshi golyn soqty, dep habarlaıdy Egemen.kz championat.com saıtyna silteme jasap.
Argentınalyq shabýylshy kásipqoı mansabyndaǵy 800-shi golyn soqty. Klýbtyq mansabynda Messı 701, ulttyq qurama sapynda 99 gol soǵa aldy.
Eske salaıyq, búgin, 24 naýryzda Argentına men Panama quramalary joldastyq kezdesý ótkizdi. Kezdesý qojaıyndary 2:0 esebimen jeńiske jetti. 89-mınýtta PSJ shabýylshysy Lıonel Messı komandasynyń ekinshi golyn soǵyp, tablodaǵy qorytyndy esepti ornatty.
Lıonel Messı 2005 jyldan beri Argentına quramasynda oınap, onyń úzdik bombardıri atandy. Ol sondaı-aq 2022 jyly Qatarda ótken álem birinshiliginde kapıtandyq tizgindi ustap, jeńimpaz atanyp, sol birinshiliktiń úzdik oıynshysy boldy.