Zerendi jylýsyz qaldy

Kúni keshe Zerendi selosyndaǵy jylý júıesinde apat oryn aldy. At tóbelindeı aýyldyń 400-den astamy turǵyn úıi men 6 birdeı áleýmettik nysan jylýsyz qaldy. Oqys oqıǵa oryn alǵan kezde ortalyq kósheniń birinde uzyndyǵy 200 metrden asatyn jylý qubyry qulap qalǵan. Qazirgi kúni mamandar apattyń naqty sebepterin anyqtaý ústinde. Bir aıta keterligi, Zerendidegi jańa qazandyq osydan eki jyl buryn ǵana ornatylyp, jeli tartylǵan. Alaıda durys jumys istemeı, turǵyndar tarapynan ókpe-renish jıi aıtylatyn.

– Jylý berý júıesine byltyr júk kóligi soǵylyp, zalal keltirgen, – deıdi Zerendi aýdany ákiminiń orynbasary Esimhan Baı­ǵabylov, – keıin bári jedel retke keltirildi. Bul jolǵy jaǵdaı buryn-sońdy oryn almaǵandyqtan, dál qazir sebebin qolmen qoıǵandaı etip aıtý qıyn. Apat nelikten oryn alǵandyǵy túbegeıli zerttelgennen keıin belgili bolady. Qalaı bolǵanda da jylý júıesin tartqan uıymdar jaýapqa tartylýy múmkin.

Aýdan ákiminiń pikirinshe, turǵyndarǵa ortalyq qazandyq arqyly jylý berý keshik­tirilmeıtin syńaıly. Kókshege kók­tem keldi degenimen, túske deıin múıiz, tústen keıin kıiz bolyp tur. Jergilikti turǵyndardyń aıtýyna qaraǵanda, úıleri sýyp ketken. Ádette bizdiń óńirde jylý sáýir aıynyń sońyna deıin beriledi.

– Jylý áli berilgen joq, – deıdi selo turǵyny Marat Shamıǵanov, – úıdiń ishi ylǵaldanyp, salqyndap ketti. Biz shydar edik, tósek tartyp jatqan adamdarǵa qıyn bolyp tur. Kóldeneń kózge kemshilik kórinip turady emes pe, osy jylý qubyry áýel bas­ta durys ornatylmaǵan sııaqty. Áıtpese, sý jańa emes pe? Bálkim, qubyrdy daladan ótkizbeı, jerdiń astymen jiberý kerek pe edi?

Búgingi tańda jylý qubyrynyń qu­laǵan bóligin qaıtadan qalpyna keltirý jumys­taryn merdiger uıym sharttyq mindet­temeler sheńberinde júrgizýde. Mamandar jylý jelisin jóndeý mamyr aıynyń so­ńyna deıin sozylýy múmkin deıdi.

Aldaǵy ýaqytta jalǵyz Zerendiniń ǵana emes, óńirdegi barlyq ınfraqurylymdardyń jaǵdaıyn súzgiden ótkizip, muqııat teksergende ǵana mundaı oqys oqıǵa oryn almaýy yqtımal.

Aqmola oblysy,

Zerendi aýdany