Polısııa qyzmetkerleri onyń qylmystyq áreketin ótken jyldyń tamyz aıynda áshkereledi, dep habarlaıdy Egemen.kz.
«Mefedron jetkizý arnasyn anyqtaý is-sharasy nátıjesinde bizdiń bólim qyzmetkerleriniń nazaryna qaladaǵy oıyn-saýyq mekemeleriniń birinde jumys isteıtin barmen tústi. Onyń jumys ornynda – túngi klýbtyń bar kassasynda mefedron satylymy uıymdastyrylǵany anyqtaldy. Kúdikti esirtki satý kezinde qolǵa tústi. Bardy jáne jeke tintý kezinde odan satýǵa daıyndalǵan, ishinde mefedron baılamdary bar temekiniń eki qoraby tárkilendi. Tergeý sharalary ustalǵan azamatshanyń turǵylyqty jerinde jalǵasty. Kúdiktiniń qurbysy esirtkiden qutylǵysy keldi, biraq bul oıy júzege aspaı qaldy. Satýǵa daıyndalǵan 20 doza mefedronnan bólek, elektrondy tarazy, qaptama materıaly jáne esirtki zaty bar 3 baılam tabyldy», dedi Almaty qalalyq PD esirtki qylmysyna qarsy kúres basqarmasynyń bastyǵy Erlan Álmaǵambetov.
Osylaısha, túngi klýbta esirtki satqan barmen 10 jylǵa bas bostandyǵynan aıyryldy.
Almaty qalasynyń qylmystyq ister jónindegi mamandandyrylǵan aýdanaralyq sotynyń qaýlysymen V. esimdi azamatsha QR QK-niń 297-baby 3-bóliginiń 3,6-tarmaǵynda kózdelgen qylmystyq quqyq buzýshylyqty jasaǵany úshin kináli dep tanyldy.