Áleýmettik jelide Qyzylorda oblysynda jasóspirimniń aıaýsyz soqqyǵa jyǵylǵany túsirilgen vıdeo tarap jatyr, dep habarlaıdy Egemen.kz tengrinews.kz saıtyna silteme jasap.
Vıdeoda eki adamnyń jerde jatqan jigitti uryp jatqany kórsetilgen. Olar jigitke «uıyqta» dep soqqy men tepkiniń astyna alady.
Keıin vıdeo áleýmettik jeliden óshirildi.
Tártip saqshylary oqıǵa bıyl 6 sáýirde Qazaly aýdanynda bolǵanyn aıtty.
«Aýdandyq aýrýhanadan kámeletke tolmaǵan balanyń emdelip jatqany týraly habarlama kelip tústi, bul derek Qazaly aýdanynyń polısııa bóliminde tirkeldi.
Jasóspirimniń aıtýynsha, sol kúni Áıteke bı kentindegi Jalańtós bahadúr atyndaǵy saıabaqta jańbyrdan keıin taıǵaq jolda abaısyzda qulap qalǵan. Qazir jigittiń jaǵdaıy qanaǵattanarlyq, jábirlenýshi men ata-anasynan shaǵym túsken joq», dedi Qyzylorda oblysynyń polısııa departamenti ókilderi.
Soǵan qaramastan tártip saqshylary áleýmettik jelide qosymsha monıtorıng júrgizip, eki kámeletke tolmaǵan balanyń bul jasóspirimdi soqqyǵa jyqqanyn anyqtady.
«Bul derek Qazaly aýdandyq polısııa bóliminiń sotaldy tergep-tekserýdiń biryńǵaı tizilimine Qylmystyq kodekstiń 293-babynyń 2-bóligi «buzaqylyq» boıynsha tirkeldi. Qazir tergeý amaldary júrgizilip jatyr. Tıisti saraptamalar taǵaıyndaldy. Kúdiktiler polısııa bólimine jetkizildi», dedi vedomstvodaǵylar.