Premer-mınıstrdiń orynbasary Altaı Kólginov Úkimet otyrysy aıasynda elordaǵa Jańaózennen kelgen munaıshylar tóńiregindegi jaǵdaıǵa qatysty pikir bildirdi, dep habarlaıdy Egemen.kz.
- «QazMunaıGaz» enshiles kompanııalarynyń jaǵdaıy týraly. Tenderlik prosedýralar júrgizilgenin bilesizder, al utylǵan kompanııa men onyń jumysshylary qazir qaıta qaraý (tender qorytyndysyn – esk.) máselesin kóterip jatyr. Biraq bári zań aıasynda sheshilýi kerek. Qazir Energetıka mınıstrligi men «QazMunaıGaz» ókilderi kelissózder, túsindirý jumystaryn júrgizip jatyr», dedi Kólginov.
Vıse-premerdiń aıtýynsha, barlyǵy zań aıasynda sheshilýi tıis.
«Olar jeńilgen kompanııanyń tenderde jeńgenin qalaıdy. Biraq bul múmkin emes. Biz muny zań aıasynda jasaýymyz kerek. Tenderlik talaptar bar, ne sotta, ne zańdy túrde bárin qarastyrý kerek. Sondyqtan jaı ǵana talap qoıý, kem degende, durys emes. Bizdiń mindetimiz olarǵa bos jumys oryndaryn usyný. Memlekettik organdar osylaı istep jatyr», dep qosty Kólginov.
10 sáýirde jańaózendik jumysshylardyń Astanaǵa jınalǵany habarlandy. Energetıka mınıstrliginiń ǵımaraty mańynda 60-70-ke jýyq adam jınaldy.