Memleket basshysy Qasym-Jomart Toqaev Ǵylym jáne tehnologııalar jónindegi ulttyq keńestiń birinshi otyrysynda ǵylym salasyndaǵy baǵyt-baǵdardy aıqyndap alý keregin atap ótti, dep habarlaıdy Egemen.kz Aqordanyń baspasóz qyzmetine silteme jasap.
Prezıdent ǵylymnyń múmkindikterine toqtalyp, qazirgi jetistikter men ǵylym alyp kelgen ózgerister týraly aıtty. Ǵylym ındýstrııasynyń qarqynyna toqtalyp qaýip-qateri jaıly da atap ótti.
«Biz, eń aldymen, jumystyń negizgi baǵdary men basymdyqtaryn aıqyndap alýymyz kerek. Qazir álemde túbegeıli ózgerister bolyp jatyr. Geosaıasat, ekonomıka jáne qoǵamdyq qatynastar buryn-sońdy bolmaǵan syn-qaterlerge tap boldy. Ǵylym men tehnologııa óte qarqyndy damýda. Ǵylym salasy qarjy aınalymy mıllıardtaǵan dollardy quraıtyn alyp ındýstrııaǵa aınaldy. Tehnologııalyq iri korporasııalardyń quny trıllıon dollarǵa jetti. Neırojeli jáne jasandy ıntellekt revolıýsııalyq úderisterge bastaý bolyp jatyr. Soǵan sáıkes múlde bólek, jańa ómir salty qalyptasýda. Onyń paıdaly jaqtarymen qatar zor qater týǵyzýy múmkin zııandy tustary da bar», dedi Qasym-Jomart Toqaev.
Sonymen qatar, ǵylymdaǵy sońǵy jańalyq jasandy ıntellektiń paıda bolýy týraly da sóz qozǵady.
«Jasandy ıntellektige baılanysty, tipti, Ilon Masktiń ózi alańdaýshylyq bildirip, onyń damýyn ázirshe toqtatý kerek dep aıtqan eken. О́ıtkeni jasandy ıntellekt búkil adamzatqa úlken qaýip tóndirýi múmkin dep eskertken. Energetıka, medısına, bıo jáne gendik ınjenerııa salasynda irgeli jańalyqtar ashyldy. Onyń bári adamzat ómirine túbegeıli ózgerister ákele bastady», dedi Memleket basshysy.