8 sáýirde elordada «Jasyl Astana» ekologııalyq aılyǵy aıasynda alǵashqy kommýnaldyq senbilik ótti. Oǵan 11 myńnan astam adam, 217 kásiporyn men uıym qatysty. Bir aı ishinde qalada taǵy birneshe senbilik uıymdastyrylady, dep habarlaıdy Egemen.kz qala ákimdiginiń resmı saıtyna silteme jasap.
8 sáýirden 6 mamyrǵa deıin elordada «Jasyl Astana» ekologııalyq aılyǵy ótedi. Aılyq sheńberinde jalpyqalalyq eki senbilikti – 22 sáýir jáne 6 mamyr, al úsh kommýnaldyq senbilikti – 8, 15 jáne 29 sáýir kúnderi – aýdandyq ákimdikter men kommýnaldyq qyzmetterdiń kúshimen ótkizý josparlanǵan.
Elordada alǵashqy kóktemgi kommýnaldyq senbilik 8 sáýirde ótti. Eńbek ujymdarynyń, qala turǵyndarynyń kómegimen polıgonǵa 555,58 tonna qoqys jınalyp, shyǵaryldy. Jalpy aýdany 2,5 mln sharshy metrden astam saıabaqtar men skverlerdi jınaý júrgizildi. Is-sharaǵa aýdandyq ákimdikter, kommýnaldyq qyzmetter, PIK jáne MIB ujymdary, shaǵyn jáne orta bıznes sýbektileri belsendi qatysty.
Sonymen qatar, Abylaı han dańǵyly, Qajymuqan, Petrov, Bólekpaev, A-105, Baltaly kóshelerinde máslıhat depýtattary, turǵyndar men eriktiler aǵash otyrǵyzdy.
Aıta keteıik, 2022 jyly Astanada ekologııalyq senbilikter aıasynda 6 myń tonnadan astam qoqys jınalyp, shyǵaryldy. Sondaı-aq 2,7 mln sharshy metr alań jınaldy.