Astanada álemde tuńǵysh ret bir eldiń shahmattan áıelder quramasy álem quramasyna qarsy oınady. Buǵan deıin mundaı jarys úsh ret tek erler quramalary arasynda ótkizilgen, dep habarlaıdy Egemen.kz.
Ár qurama eki komandadan turady. «A» komandalarynyń quramynda tórt eresek sportshy bar. Al «V» komandalary – 14, 16, 18 jáne 20 jasqa deıingi sportshylar.
Matchtyń ashylý saltanatyna Qazaqstan Respýblıkasynyń Sport jáne mádenıet mınıstri Ashat Oralov qatysty. Ol bul matchty nátıjege qaramastan, tarıhı dep ataýǵa bolatynyn jáne elimizdiń ǵana emes, sheteldiń de sport shejiresine enetinin atap ótti. Mınıstr qazaqstandyq shahmatshylarǵa otandyq shahmattyń damý tarıhyn jazǵany úshin alǵys aıtyp, kezdesýdi resmı túrde ashyq dep jarııalady.
Birinshi júris quqyǵy Qazaqstan shahmat federasııasynyń prezıdenti Tımýr Týrlovqa berildi.
Matchtyń jerebe tartý nátıjesi boıynsha, Hoý Ifan qazaqstandyq grossmeıster Dınara Sádýaqasovaǵa qarsy qara fıgýralarmen oınady. Úndistandyq shahmatshy Harıka Drıýnavallı Merýert Kamalıdenovaǵa qarsy shyqty. Qazaqstandyq grossmeıster Bıbisara Asaýbaeva oıyndy Ázerbaıjan ókili Gúnaı Mamedzadege qarsy bastady. Grossmeıster Jansaıa Ábdimálik te grýzın shahmatshysy Nana Dzagnıdzege qarsy qara fıgýramen oınady.
Jasóspirimder arasynda jerebe bylaı shyqty: qazaqstandyq Zarına Nurǵalıeva ózbekstandyq Afrýza Hamdamovaǵa qarsy aq tústi, al Ksenııa Balabaeva bolgarııalyq Nurgúl Salımovaǵa qarsy qara tústi fıgýralarmen oınady. Vengrııalyq Joka Gaal qazaqstandyq Alýa Nurmanovaǵa qarsy qara tústi, úndistandyq shahmatshy Shrı B.Savıta jerlesimiz Lııa Qurmanǵalıevaǵa qarsy qara tústi fıgýralarmen bastady.
Búgin qyzdar rapıd boıynsha 4 raýnd oınady. Kezdesýdiń birinshi kúni sheteldik sportshylardyń basymdyǵymen aıaqtaldy.
Qazaqstan komandasy 13,5 upaı, al Álem quramasy 18,5 upaı jınady. Hoý Ifan Dınara Sádýaqasova men Jansaıa Ábdimálikpen teń túsip, Merýert Kamalıdenovany utyp, Bıbisara Asaýbaevadan utyldy.
Matchtyń tolyq statıstıkasyn myna saıttan kórýge bolady.
Búgin olar rapıdtiń taǵy 4 raýndyn, al 19 sáýirde segiz raýndtyq blıs oınaýy kerek. Osymen jeńimpaz qurama belgili bolady.
Aıta keteıik, áıelder arasyndaǵy komandalyq matchtyń jalpy júlde qory 50 000 dollardy quraıdy.