Prezıdent el ekonomıkasyn ilgerletýde iri kásipkerlerdiń úlken úles qosatynyn atap ótti, dep habarlaıdy Egemen.kz Aqordanyń baspasóz qyzmetine silteme jasap.
Memleket basshysy iri kásipkerlerdi eldegi áleýmettik máselelerge beı-jaı qaramaı, birge atsalysýǵa shaqyrdy.
«Memlekettiń qoldaýyna ıe bolyp otyrǵan iri bıznes ókilderi aıryqsha ról atqarady. «Tabysty osy jerden taýyp, shetelde shashý» ádetinen arylý kerek. Esesine, eldegi áleýmettik máselelerdi sheshýge kóbirek úles qosýǵa umtylǵan jón», dedi Qasym-Jomart Kemeluly.
Sondaı-aq kásipkerler tapqan tabysyn el ekonomıkasyna salýy qajettigin atap ótti.
«Iri kásipkerler Qazaqstanda tapqan tabysyn basqa jaqta emes, óz elimizdegi bıznesin damytýǵa jumsaǵany abzal. Jumysyn osy talapqa beıimdeı alǵan iri kásipkerler naǵyz ulttyq bıznes-elıtaǵa aınalady. Halyqtyń qurmetine bólenip, memlekettiń qorǵaýy men qoldaýyna ıe bolady.
Sonymen qatar bizge «kásipkerlerdiń jańa tolqyny» kerek. Memlekettiń resýrsyna arqa súıemeı, boıyndaǵy daryny men iskerligi arqyly turaqty ári myqty kásip qura bilgen «tyń kúshter» qajet», dedi Prezıdent.