Eńbek jáne halyqty áleýmettik qorǵaý mınıstri Tamara Dúısenova «Egemen Qazaqstan» gazetine bergen suhbatynda memlekettik qoldaýdyń jańa paradıgmasy jóninde egjeı-tegjeıli aıtyp berdi, dep habarlaıdy Egemen.kz.
Jalpy jańadan qabyldanǵan áleýmettik kodekstiń bes basty jańalyǵy bar. Solardyń biri - áleýmettik táýekelderdiń aldyn alatyn ataýly is-shara. Tamara Dúısenova osy shara negizinde memleket jumysynan aıyrylǵan adamdarǵa qarjylaı emes, qaıta jumysqa turýyna járdemdesetinin aıtty.
«Jańa paradıgmaǵa sáıkes memlekettik qoldaý aldymen áleýmettik táýekelderdiń aldyn alatyn ataýly is-shara, odan keıin ǵana ataýly áleýmettik kómek retinde qarastyrylady. Túsinikti bolýy úshin mysal keltire keteıin. Otbasynyń sıfrlyq kartasy jyl basynda áleýeti joǵary bolǵan otbasynyń 5 aıdan soń áleýeti tómen otbasy kategorııasyna ótkenin kórsetti. Taldaý nesıeni alǵan adamǵa 3 aıdan beri zeınetaqy jarnasynyń túspegenin, ıaǵnı jumyssyz qalǵanyn aıqyndady. Sondyqtan biz ol azamattyń mamandyǵyn eskere otyryp, jumysqa turý múmkindigi týraly SMS habarlama jiberdik. Qazir bul azamat jumysqa turdy, nesıeni qaıtarýǵa qatysty da problemasy joq. Kórip otyrǵanyńyzdaı, memleket qarjylaı kómek emes, ataýly is-sharany qoldana otyryp, áleýmettik táýekeldiń aldyn aldy. Mundaı múmkindikti bıyl Otbasynyń sıfrlyq kartasy arqyly tájirıbege engizdik. Sondyqtan aldaǵy ýaqytta otbasylardyń áleýeti jónindegi taldaý jumystary kúsheıtilip, memlekettik organdar men otbasylar arasyndaǵy baılanys jańa deńgeıge kóteriledi degen úmittemin», dedi mınıstr.
Sondaı-aq Tamara Qasymqyzy atalǵan áleýmettik kómektiń joıylmaıtynyn, qarjylaı kómek tek jumysqa jaramsyz otbasy múshelerine beriletinin atap ótti. Al kedeılik shegin esepteý júıesine ózgerister engiziledi.
«Eger otbasy qıyn jaǵdaıda bolsa, onda ataýly áleýmettik kómek ataýly is-sharamen bir mezgilde beriledi. Mysaly, otbasyna aı saıyn ataýly áleýmettik kómek, al otbasynyń jumysqa jaramdy múshelerine oqý, jumys, grant jáne jeńildetilgen nesıe sııaqty memlekettik qoldaý is-sharalary kórsetiledi.
Osy baǵyttaǵy taǵy bir mańyzdy ózgeris ataýly áleýmettik kómek berý úshin kedeılik shegi búgingi kúnkóris deńgeıi arqyly emes, medıandyq kiris deńgeıi arqyly anyqtalady», dedi tamara Dúısenova Egemen Qazaqstan» gazetine bergen suhbatynda.