Almatyda Qazaqstandaǵy bultty tehnologııalardyń bolashaǵy, IT naryǵyndaǵy trendter jáne kıberqaýipsizdik boıynsha konferensııa ótti, dep habarlaıdy Egemen.kz.
IT mamandar bas qosqan jıyn barysynda álemdik naryq jáne servıstik qajettilikter boıynsha usynystar aıtyldy. Sarapshylar Qazaqstan IT naryǵynyń trendteri jáne bultty platformalar, qosymshalardyń qaýipsizdigin qamtamasyz etý tásilderi týraly aıtyp, jýrnalısterdiń suraqtaryna jaýap berdi.
Osy oraıda Qazaqstanda shaǵyn jáne iri bıznesti sıfrlandyrýǵa arnalǵan VK Cloud bultty platformasy QazCloud-pen seriktestik ornatýy taıaý keleshekte bul baǵyttaǵy túıtkildi máselelerdi sheshýge yqpal etedi. Birinshiden, servıstik qyzmet aıasy keńeıetin bolsa, ekinshiden IT mamandardyń biliktiligin arttyrýǵa yqpal etedi. VK Cloud tehnologııasy men qyzmeti iri jáne shaǵyn kásip pen startaptardyń sandyq jobalaryn damytýǵa, olardy naryqqa tezirek shyǵarýǵa jáne ıkemdi masshtabtaýǵa kómektesedi. Bult platformasy Qazaqstan kompanııalaryna beıimdele otyryp, el zańnamasyna sáıkes QazCloud sandyq ortalyǵynda ornalasatyn bolady.
Bult platformasy 20-dan astam aldyn ala konfıgýrasııalanǵan IaaS jáne PaaS qyzmetin biriktiredi. Atalǵan servısterdiń kómegimen derekterdi saqtaýǵa múmkindik artýymen qatar, ınfraqurylymdy sanaýly mınýttarda ornalastyrýǵa bolady.
VK Tech basqarýshy dırektory Pavel Gontarevtyń aıtýynsha, bultty servıster sıfr ónimin ázirleý men damytýdyń standartyna aınalyp, nátıjesin naryqqa shyǵarýǵa jedeldetýmen qatar, básekelestik artyqshylyǵyna yqpal etedi. Sonymen qatar aqparattyq tehnologııalar ınfraqurylymyn qurý jáne kıberqaýipsizdikti qamtamasyz etýden bastap derekterdi saqtaý men óńdeýge jáne ML modelderimen jumys isteýge múmkindik beredi.
«Astanadaǵy jasyl tehnologııalar boıynsha salynǵan QazCloud derekter ortalyǵy VK Cloud lokalızasııalanǵan platformasy bar Qazaqstannyń IT mamandaryna barlyq quraldy Qazaqstan aýmaǵynda transshekaralyq derektersiz, ıaǵnı artyq shyǵyndarsyz alýǵa kómektesedi. О́ıtkeni qazirgi kezde elimizdegi kóptegen kompanııalar óz derekterin Google, Amazon, Yandex sııaqty shetel platformalarynda saqtaýǵa májbúr. Endigi kezekte bulttyq servıstik platformalardyń óz elimizde damýy otandyq komanııalar derekteriniń ashyqtyǵy men qaýipsizdiginiń kepili bola alady», deıdi QazCloud bas dırektory Qasym Esergepov.
VK Cloud bult platformasy Qazaqstan naryǵyna beıimdelgen. Jergilikti sandyq ortalyqqa ornalastyrý «Derbes derekter týraly» zańnama talaptarynyń saqtalýyn, sondaı-aq qyzmettiń joǵary jumys jyldamdyǵyn qamtamasyz etedi. Al Qazcloud ınfraqurylym provaıderi IT-ınfraqurylymdy qoldaý, qyzmet kórsetý jáne jańǵyrtý, vırtýal resýrstardy jalǵa alý jáne ornalastyrý, IT-aýtsorsıng, aqparat qaýipsizdigi jáne júıelerdi tehnıkalyq turǵydan súıemeldeıdi.