24 sáýirde Astana qalasyndaǵy Ulttyq ulannyń 5573 áskerı bóliminde Parlament Májilisiniń Halyqaralyq ister, qorǵanys jáne qaýipsizdik komıtetiniń kóshpeli otyrysy ótti, dep habarlaıdy Egemen.kz.
Komıtet tóraǵasynyń basshylyǵymen ótken otyrysqa Ishki ister mınıstriniń orynbasary - QR Ulttyq ulanynyń Bas qolbasshysy general-maıor Erkin Botaqanov jáne onyń baǵyttar boıynsha orynbasarlary, sondaı-aq Bas qolbasshylyqtyń bas basqarmalarynyń basshylary qatysty.
Otyrys barysynda Ulttyq ulan Bas qolbasshysynyń birinshi orynbasary – Bas shtab bastyǵy general-maıor Qaırat Aqtanov halyq qalaýlylaryn quqyqtyq tártip áskerleriniń qazirgi jaǵdaıy men damý perspektıvalary týraly egjeı-tegjeıli habardar etti. Sonymen qatar olarǵa qyzmettik-jaýyngerlik mindetterdi oryndaý kezinde áskerlerdiń tynys-tirshiligine eleýli áser etetin birqatar problema aıtyldy.
Atap aıtqanda, Astana qalasynda Ulttyq ulan avıabazasyn, Ulytaý oblysynyń Jezqazǵan qalasynda jáne Túrkistan oblysynyń Túrkistan qalasynda áskerı qalashyqtardy salýǵa áskerlerdi qosymsha qarjylandyrý máseleleri qozǵaldy, sondaı-aq arnaıy maqsattaǵy bólimshelerdi nyǵaıtý úshin qarjylandyrýdy keńeıtý máseleleri talqylandy.
- Memleket basshysy Q. Toqaev Ulttyq ulandy sandyq jáne sapalyq jaǵynan jaraqtandyrý mindetin qoıdy. Bir jyldan beri bul jumys júrgizilýde. Aıta ketý kerek, Ulttyq ulan tek respýblıkalyq bıýdjet esebinen qarjylandyrylady jáne qosymsha qarjylandyrý kózderi joq. Buǵan deıin Memleket basshysyna Ulttyq ulan bıýdjetiniń ulǵaıýy týraly baıandalǵan bolatyn, biraq bul qarjy qarajaty áskerlerdiń shtat sanyn ulǵaıtýǵa ketken bolatyn. Bolashaqta qarjy tapshylyǵyna tap bolamyz dep boljanýda, - dedi áskerlerdiń Bas qolbasshysy.
Kóshpeli otyrys barysynda Ulttyq ulannyń tynys-tirshiligine qatysty basqa da máseleler talqylandy. Qorytyndylaı kele, komıtet tóraǵasy Aıgúl Quspan bastaǵan komıtet músheleri Ulttyq ulannyń qyzmettik-jaýyngerlik qyzmettiń barlyq mindetterin oryndaýǵa daıyn ekendigine kóz jetkizdi.
- Ulttyq ulannyń qyzmetin sapaly jáne jedel júzege asyrý úshin sheshilýi qajet birqatar másele bar. Biz olardy túrtip aldyq jáne olardy júzege asyrýǵa kúsh salamyz. Kóshpeli otyrysty uıymdastyrǵany úshin alǵys aıtqym keledi. Biz búgin áskerılerdiń kózinen patrıotızmdi kórdik. Biz áskerı qarjylandyrý tapshylyǵy máselesin sheshemiz dep oılaımyz, - dedi Aıgúl Quspan.
Halyq qalaýlylary «Búrkit» arnaıy maqsattaǵy bólimsheleriniń negizgi mindetterimen, bólimniń ınfraqurylymymen, kazarmalyq-turǵyn úı qorymen, materıaldyq-tehnıkalyq jaraqtandyrýmen, áskerı tehnıkamen jáne qarý-jaraqpen, sondaı-aq Ulttyq ulan arnaıy kúshteriniń damý perspektıvalarymen kózderimen tanysty.
Kezdesý qorytyndysy boıynsha depýtattar Ulttyq ulan áskerleriniń qolbasshylyǵy tarapynan aıtylǵan máselelerdi sheshý úshin olardyń odan ári zańnamalyq qyzmeti barynsha paıdalanylatynyna sendirdi.