Premer-mınıstr Álıhan Smaıylovtyń tóraǵalyǵymen ótken Investısııalyq ahýaldy jaqsartý jónindegi keńes otyrysynda aýyl sharýashylyǵy salasyn damytý boıynsha usynystar men eldegi azyq-túlik qaýipsizdigin qamtamasyz etý sharalary qaraldy, dep habarlaıdy Egemen.kz Úkimet basshysynyń baspasóz qyzmetine silteme jasap.
Keńeske Kanada, Ulybrıtanııa jáne Eýropalyq Odaqtyń Qazaqstandaǵy elshileri, AQSh saýda palatasynyń, Eýropalyq qaıta qurý jáne damý bankiniń, Azııa damý bankiniń ókilderi, ortalyq memlekettik organdar men birqatar jeke kompanııa basshysy qatysty.
Premer-mınıstr Qazaqstannyń óńirlik jáne jahandyq azyq-túlik qaýipsizdigin qamtamasyz etýge úlken úles qosyp otyrǵanyn atap ótti. Respýblıka astyq daqyldaryn eksporttaıtyn álemdegi 10 iri el qatarynda. Atap aıtqanda, byltyr Qazaqstan alǵash ret postkeńestik elderdi artqa tastap, azyq-túlik qaýipsizdiginiń jahandyq reıtınginde 32-orynǵa jaıǵasty.
«Agroónerkásiptik keshendi damytý saıasaty eń aldymen, ishki naryqty otandyq azyq-túlik ónimderimen qamtamasyz etýge baǵyttalǵan. Byltyr 2024 jylǵa deıingi Azyq-túlik qaýipsizdigi josparyn qabyldadyq, aýyl sharýashylyǵyn ártaraptandyrý aıasynda 2030 jylǵa deıingi AО́K-ti damytý tujyrymdamasy júzege asyrylýda», dedi Álıhan Smaıylov.
Azyq-túlik qaýipsizdigin qamtamasyz etýdegi mańyzdy faktorlardyń biri — klımattyń ózgerýine beıimdelý prosesi. Bul maqsatta Qazaqstanda balamaly energııa kózderine kezeń-kezeńimen kóshý jáne energııa tıimdiligin arttyrý boıynsha jumystar júrgizilip jatyr.
«Sondaı-aq biz úshin sý jáne jer resýrstaryn turaqty basqarý — óte mańyzdy baǵyttar. Qazir Prezıdent tapsyrmasyna sáıkes jańa Sý kodeksi ázirlenip jatyr. Egin alqaptary qurylymyn ártaraptandyrý boıynsha jumystar jalǵasýda jáne sýarmaly jerlerdi ulǵaıtý boıynsha belsendi sharalar júzege asyrylýda», dep atap ótti ol.
Premer-mınıstr bul baǵytta eski sýarý júıelerin jańǵyrtý jobalarynyń da júzege asyrylyp jatqanyn, sonymen qatar jańa ırrıgasııalyq nysandar qurylysy josparlanyp otyrǵanyn aıtty.
Keńeske qatysýshylar sút óndirisin jáne aýyl sharýashylyǵy salasynyń basqa da sektorlaryn damytý, ónimderdiń ımporty men eksporty, memlekettik retteý, sýbsıdııalaý, ınvestısııa tartý, taýar bırjalarynyń qyzmeti, ınnovasııalar engizý, salalyq bilim berý jáne basqa da máselelerdi talqylady.
Jıyn qorytyndysy boıynsha Premer-mınıstr qatysýshylarǵa rızashylyǵyn bildirip, elimizdiń azyq-túlik qaýipsizdigin odan ári nyǵaıtý úshin keńeste aıtylǵan barlyq usynystyń jan-jaqty pysyqtalatynyn aıtty.
«Búginde AО́K salasynda ınvestorlarǵa salyqtyq, kedendik preferensııalar jáne basqa da qoldaý sharalary qarastyrylǵan. Úkimet ekonomıkadaǵy bıznes ortany jáne ınvestısııalyq ahýaldy, onyń ishinde, AО́K salasyn jetildirý boıynsha jumystaryn jalǵastyrady», dep túıindedi Á. Smaıylov.