Elordada qazaq tilinde onlaın kontent jasaýshylardyń VI forýmy ótti. Jyldaǵy dástúrge saı tanymal blogerler men medıa salasy mamandarynyń basyn qosqan alqaly jıynǵa bıyl «Jasandy ıntellekt dáýiri: qazaq medıasyn qaıta zerdeleý» taqyryby arqaý boldy.
Forýmǵa qatysqan Aqparat jáne qoǵamdyq damý mınıstri Darhan Qydyráli ǵalamtordaǵy memlekettik til aıasynyń keńeıýi úshin jasalyp jatqan aýqymdy jumystarǵa toqtaldy. Mınıstrdiń aıtýynsha, qazirgi kúni memlekettik medıadaǵy qazaq tiliniń úlesi 83 paıyzǵa jetken.
– Memlekettik tildiń BAQ-taǵy úlesi arta tústi. Mysaly, ótken jyly memlekettik BAQ-taǵy qazaq tilindegi kontenttiń úlesi 83 paıyzdy qurady. Atap aıtqanda, telearnalardaǵy qazaq tiliniń úlesi 77 paıyzǵa jetse, baspa BAQ-ta – 85 paıyz, ınternet-resýrstarda 87 paıyzǵa jetti, – dedi ol.
Darhan Qýandyquly medıa naryqta qazaqtildi BAQ-qa jarnama berýshiler qatary da artyp kele jatqanyn jetkizdi. Onyń sózinshe, otandyq resýrstarda PR maqalalardy ornalastyrý kólemi ósip jatyr.
– Osy rette, ınternet-jarnamany retteý, áleýmettik jelilerdegi ınterfeıs pen jarnamalyq algorıtmderdi, monetızasııalaý júıesin qazaq tilinde jasaý óte mańyzdy. Atalǵan másele mınıstrlik ázirlep jatqan «Internet jarnama jáne onlaın platformalar týraly» zań jobasynda qarastyrylyp jatyr. Jalpy, bul zań jobasy birinshi kezekte azamattardyń quqyǵyn qorǵaýǵa, onlaın ortany qaýipsiz jáne ashyq túrde damytýǵa baǵyttalǵan. Búginde BAQ salasyndaǵy zańnamany jetildirý jumystary júrip jatyr, – dedi mınıstr.
«Qazaq Forum» otandyq kontent jasaýshylar forýmy qazaq tilindegi jańa medıanyń damýyna serpin beretin jıyn ekenin aıtqan Darhan Qydyráli mınıstrlik tarapynan álemdegi sońǵy úrdisterdi eskere otyryp, jańa sıfrlyq medıa men kreatıvti ındýstrııany damytý jónindegi jumystardy jandandyrý kózdelip otyrǵanyn jetkizdi. Qazirgi kúni «Meta», «TikTok», «Google», «Mail.Ru Group», «LinkedIn», «Netflix» kompanııalarymen kelissóz júrgizilip, tyǵyz qarym-qatynas ornatylǵan.
– Kelissózder nátıjesinde «Meta» kompanııasyna qarasty Instagram, Whatsapp, Facebook, Messenger-diń elimiz boıynsha resmı ókilderi aıqyndaldy. Sondaı-aq «TikTok» korporasııasynyń aımaqtyq keńsesi ashyldy. Facebook pen TikTok-tiń ınterfeısin qazaqshalaý boıynsha kelisimder jasaldy. TikTok kompanııasymen 13 jasqa tolmaǵan balalardyń platformany paıdalanýyn jáne zııandy mazmundy kontentterdi birlesip anyqtaıtyn bolamyz. Munyń bári bizge úlken jaýapkershilik júkteıdi, – dedi mınıstr.
Forýmǵa qatysqan spıkerlerdiń aıtýynsha, qazirgi kúni el halqynyń 45-50 paıyzy áli kúnge dástúrli medıany tutynady. Iаǵnı teledıdar kórip, radıo tyńdap, gazet-jýrnal oqıtyn adamdar qatary azaıǵan emes. Osyǵan oraı Aqparat jáne qoǵamdyq damý mınıstri sońǵy ýaqytta qol jetkizilgen jaǵymdy jańalyqpen bólisti. Budan bylaı halyq gazet-jýrnalǵa jazylý úshin poshta bólimshesine baryp júrmeıdi, úıinde otyryp-aq kaspi.kz qosymshasy arqyly jazyla alatyn boldy.
– «Kaspi Bank»-pen áriptestik baılanys ornatyp, baspasózge onlaın jazylý boıynsha kelisimge keldik. Mundaı qadamdar jazylýshylarǵa ońtaıly joldar usynyp, olardyń qataryn arttyrady degen senimdemiz, – dedi mınıstr.
Onyń aıtýynsha, ázirge qosymsha arqyly 18 basylymǵa jazylýǵa múmkindik bar. Sonyń ishinde oqyrmandarymyz «Qazaq gazetteri» JShS-na qaraıtyn «Egemen Qazaqstan», «Kazahstanskaıa pravda» jáne «Ana tili» gazetterine de onlaın jazyla alady. Atalǵan gazet-jýrnaldarǵa jazylý úshin Kaspi.kz qosymshasyna kirip, «Tólemder», onyń ishinde «Basqasy» degen batyrmany basyp, «QR Baspa basylymdary» degen bólimge ótesiz, ári qaraı qajet basylymdy tańdap, tólem jasaı alasyz.
Bıylǵy «Qazaq Forum»-da «Monetızasııa. Nege bári muz?», «Immersiveness. Qazaqstandyq jýrnalıstıka jańa trendterge daıyn ba?», «From TV to YouTube: beıimdelý, tendensııa jáne jańa múmkindikter», «Tanymdyq kontenttiń áleýeti» taqyryptarynda paneldik sessııalarmen qatar, «Podkasty qalaı júzege asyrý kerek?», «Medıa jelide jasandy ıntellekti qoldaný tásilderi» atty sheberlik synyptary ótti.