Búgin Aqtóbe óńiriniń barlyq aýdandarynda jáne oblys ortalyǵynda Qazaqstan halqynyń birligi kúnin merekeleýge arnalǵan «El birligi: qasıetti dombyra» atty Dombyra party is-sharasy ótti, dep habarlaıdy Egemen.kz oblys ákimdiginiń baspasóz qyzmetine silteme jasap.
Oǵan Aqtóbe oblysynyń ákimi Eraly Toǵjanov, qoǵam ókilderi, qala turǵyndary men qonaqtary qatysty.
О́ńir basshysy Qazaqstan halqynyń birligi kúni dostyqty, patrıotızm men beıbitshilikti nasıhattaıtyn mereke ekenin atap ótti.
«Bizdiń táýelsizdigimiz birlikpen, qoǵamdyq kelisimmen jáne turaqtylyqpen tyǵyz baılanysty. Birlik kúninde uıymdastyrylǵan «El birligi: qasıetti dombyra» is-sharasyn ótkizýimiz óte sımvoldyq mánge ıe. О́ıtkeni dombyra qazaq halqynyń mýzykalyq mádenıetiniń basty sımvoly. Uly dalanyń ulttyq aspabynyń úni Aqtóbe shaharyna, barlyq aýdan ortalyqtaryna jetkizildi. 6000 bala qazaq halqynyń kórnekti kompozıtorlarynyń ólmes shyǵarmalaryn bir mezette oryndaý arqyly ulttyq mýzykalyq aspapqa degen súıispenshiligin kórsetti. Bul úshin kóp rahmet. Osyndaı óskeleń urpaǵy bar Qazaqstannyń bolashaǵy zor», dep atap ótti óńir basshysy.
Aqtóbede Dombyra party aksııasy О́ner ortalyǵynan bólek, Shyǵarmashylyq akademııasy ǵımaraty aldynda, Eset batyr shaǵyn aýdanynyń Esetbatyr eskertkishi janyndaǵy alańy sekildi birneshe jerde bir mezgilde ótti.
Is-sharaǵa qatysýshylar A.Jubanovtyń «Bı», Qurmanǵazynyń «Balbyraýyn» jáne Á. Jeldibaevtyń «Erkesylqym» kúılerin oryndady.
Oblys ákimi qazaq mýzykalyq aspaptarynyń úıirmelerine baratyn etnos ókilderiniń oqýshylaryna dombyra tabystady. Daryndy jastardy qoldaý maqsatynda taǵy birneshe balaǵa mýzykalyq stýdııada án jazýǵa sertıfıkattar tartý etildi.