Prezıdent Qytaıdyń Sıan qalasynda ótip jatqan «Ortalyq Azııa – Qytaı» sammıtinde transshekaralyq sý resýrstaryn tıimdi paıdalaný týraly aıtty, dep habarlaıdy Egemen.kz Aqordanyń baspasóz qyzmetine silteme jasap.
«Ortalyq Azııa elderiniń tushy sý tapshylyǵyna ushyraý qaýpi joǵary ekeni belgili. 2050 jylǵa qaraı 5 mıllıardtan astam adam aýyz sýǵa muqtaj bolýy múmkin. Bul – Birikken Ulttar Uıymynyń deregi. Sarapshylar bizdiń aımaǵymyzdyń tez jylynyp bara jatqanyn aıtyp otyr. Klımattyń ózgerýine baılanysty bizdiń aımaqtyń basty sý kózi sanalatyn muzdyqtar da kúrt azaıyp barady. Osy jaǵdaı Ortalyq Azııanyń azyq-túlik, energetıka jáne ekologııa qaýipsizdigine edáýir qater tóndiredi. Sondyqtan birlesip shuǵyl sharalar qabyldaýymyz qajet», dedi Memleket basshysy.