Jyl basynan beri Prezıdent Is basqarmasy Medısınalyq ortalyǵyna qarasty «Qarlyǵash» balabaqshasy óńirlerge shyǵyp, áriptesterimen tájirıbe almasyp júr, dep habarlaıdy Egemen.kz.
Atap aıtqanda, Aqtóbe, Aqmola, Shyǵys Qazaqstan oblystary men Shymkent qalasyndaǵy mektepke deıingi uıymdarmen kezdesýler ótip, ınovasııalyq balabaqsha óziniń zamanaýı ádisteri men tehnologııalarymen tanystyryp, ozyq pedagogıkalyq tájirıbesimen bólisti.
Atyraý qalasyndaǵy kezekti jumys sapary aıasynda «Qarlyǵash» balabaqshasynyń basshysy Beıbitgúl Qazaqpaeva bastaǵan pedagogter toby jergilikti 7 balabaqshada bolyp, kezdesýler ótkizdi. Sondaı-aq Atyraý qalalyq bilim bóliminiń mamandary jáne pedagogterdiń basyn qosqan dóńgelek ústelge qatysty. Otyrysta Atyraý qalalyq bilim bóliminiń mektepke deıingi tárbıe bóliminiń ádiskeri Jumaǵanym Qarabalıeva mundaı sharalardyń óńirdegi mektepke deıingi uıymdardyń pedagogterine tájirıbe almasý, biliktiligin arttyrý turǵysyndaǵy mańyzdylyǵyn atap ótti.
«Qarlyǵash» balabaqshasynyń dırektory Beıbitgúl Qazaqpaeva atyraýlyq áriptesterin balabaqshanyń jetistikterimen tanystyryp, oqytýdyń ınnovasııalyq ádisterine jan-jaqty toqtaldy. Mektepke deıingi uıymnyń mamandary Asel Sadvakasova «Balalar kvantorıýmy» ádisi týraly aqparat berip, sheberlik synybyn ótkizse, ádisker Nurjan Nabatova bilim berý sapasyn baǵalaýda kómektesetin «ECERS-3» shkalasyn paıdalaný boıynsha semınar-trenıng ótkizdi. Dóńgelek ústel barysynda Atyraý qalasyndaǵy balabaqshalardyń pedagogteri óz oı-pikirlerin ortaǵa salyp, suraqtaryn qoıdy.
Jalpy kezdesý aıasynda «Qarlyǵash» balabaqshasy respýblıka boıynsha mektepke deıingi bilim berý mekemeleriniń kóshbasshysy retinde óz tájirıbesin óńirlerdiń mektepke deıingi uıymdaryna taratýǵa árdaıym daıyn ekendigi atalyp ótti. Bıyl balabaqsha osy formattaǵy is-sharalar tizbegin elimizdiń ózge de óńirlerinde ótkizýdi josparlap otyr.