Elimizdegi úzdik tennısshilerdiń biri Tımofeı Skatov Fransııada jalaýy jelbiregen «Úlken dýlyǵa» sanatyndaǵy Rolan Garros týrnıriniń negizgi kezeńine joldama aldy.
Tennısten Qazaqstannyń erler arasyndaǵy ekinshi, álemniń 147-raketkasy T.Skatov Fransııa ashyq chempıonatynyń irikteý saıystarynda baq synap, negizgi kezeńde oınaıtyn úsh otandasymyzdyń (Aleksandr Býblık, Elena Rybakına jáne Iýlııa Pýtınseva) qataryn tolyqtyrdy.
Skatov irikteý básekeleriniń fınalynda álemniń 165-raketkasy, brazılııalyq Felıpe Melıgenı Rodrıges Alvesten úsh sette 2:6, 7:5, 6:3 esebimen basym túsip, karerasynda alǵash ret Fransııa ashyq chempıonatynyń negizgi kezeńinde oınaý múmkindigine ıe boldy. Ol alǵashqy aınalymynda álemniń 33-raketkasy, bolgarııalyq Grıgor Dımıtrovpen sheberlik baıqasady.
Sonymen qatar E.Rybakına Rolan Garros týrnıriniń birinshi kezeńinde 16 jastaǵy chehııalyq Brenda Frýhvırtovamen, Iý.Pýtınseva belgııalyq Marına Zanevskaıamen, A.Býblık irikteý saıystarynyń jeńimpazy ıtalııalyq Djýlıo Zeppıerımen sheberlik baıqasady.