Regbı 15-ten Qazaqstan áıelder quramasy Almatyda uıymdastyrylǵan XII Azııa chempıonatynyń fınalynda Japonııa qyzdarymen sheberlik baıqasyp, qarsylastaryna iri eseppen jol berip qoıdy.
Jerlesterimiz jartylaı fınalda Gonkong regbıshilerinen 27:23 esebimen basym túsip, fınalǵa joldama alǵan-dy. Biraq bas júlde úshin ótken básekede Kúnshyǵys eli ókilderiniń qarqynyna tótep bere almady – 72:0. 2006 jyldan beri uıymdastyrylyp kele jatqan regbıden áıelder arasyndaǵy sary qurlyq básekesinde Qazaqstan quramasy 5 márte top jarǵan bolsa, Japonııa quramasy keshegi jeńisiniń arqasynda otandastarymyzben teńesip aldy. Al Qytaı men Gonkong regbıshileri bir-bir márte altyn tuǵyrdan kóringen.
Olımpıada baǵdarlamasyna kirmeıtin regbıdiń bul túrinde (15 adam oınaıtyn) ár komandada 26 sportshydan bolady. Ár taım (2) 40 mınýtqa sozylady. Anna Iаkovleva baptaıtyn elimizdiń regbıshileri qazirgi tańda álem reıtıngte 19-orynda tur.