Jambyl oblysyndaǵy oq-dáriler qoımasynda otpen arpalysyp qaza tapqan órt sóndirýshi, Halyq Qaharmany Meıirjan Aımanovtyń Pavlodarda mýraly salyndy. Kerekýlik órt sóndirýshiler batyr áriptesin eske alyp, rýhyna qurmet kórsetti.
Halyq Qaharmanynyń erligi el esinde. 2021 jyldyń 26 tamyzynda Jambyl oblysyndaǵy áskerı bólimderdiń birinde oq-dári saqtaıtyn qoıma órtendi. О́rtti sóndirý, evakýasııalaý jumystaryna óńirlik tótenshe jaǵdaılar departamenti órt sóndirý jáne avarııalyq-qutqarý jumystary qyzmeti bastyǵynyń orynbasary Meıirjan Aımanov jetekshilik etip, eki áriptesin órtten aman alyp shyqqan edi. Alaıda ekinshi jarylys batyrdyń ómirin qıdy. Qazaqstan Respýblıkasyna sińirgen asa úzdik eńbegi, qyzmettik boryshyn atqarýda kórsetken erjúrektigi men janqııarlyǵy úshin marqumǵa Halyq Qaharmany ataǵy berildi.
Eren erliktiń úlgisin tanytqan M.Aımanovqa Pavlodar jerinde mundaı qurmettiń jasalýy teginnen-tegin emes. Ol 1995-1997 jyldar aralyǵynda Ishki ister mınıstrliginiń Pavlodar tehnıkalyq kolledjinde bilim alǵan. Akademık Shókın-Kataev kósheleriniń qıylysyndaǵy kópqabatty úıdiń qabyrǵasyna salynǵan mýral órt sóndirýshilerdiń janqııarlyq eńbegine arnalyp otyr.
Esterińizge sala keteıik, Jambyldaǵy tótenshe oqıǵa saldarynan 18 adam kóz jumǵan bolatyn. Onyń 10-y – azamattyq qorǵanys ókili.
Pavlodar