Fransııada ótip jatqan tennısten «Úlken dýlyǵa» sanatyndaǵy Rolan Garros týrnırin Qazaqstan tennısshisi jeńispen bastady.
Júlde qory 49 600 000 eýrony quraıtyn Fransııa ashyq birinshiliginiń alǵashqy aınalymyn jerlesterimizden birinshi bolyp áıelder arasyndaǵy elimizdiń – ekinshi, álemniń 58-raketkasy Iýlııa Pýtınseva bastap berdi. Ol alǵashqy aınalymda dúnıejúzilik reıtıngte 89-orynda turǵan Belgııanyń atynan synǵa túsip júrgen ýkraınalyq Marına Zanevskaıamen sheberlik baıqasty. Eki jarym saǵatqa jýyq jalǵasqan tartysty matchta Pýtınseva 2:0 esebimen jeńiske jetti.
Birinshi partııany tennısshiler bir-bir breık almasýmen bastady. Sodan keıingi úsh geımde M.Zanevskaıa myqtylyq tanytyp, 4:1 esebimen alǵa shyǵyp aldy. Biraq Iýlııa qarsylasyna bul partııada jeńiske jetýge múmkindik bergen joq. Dopty oıynǵa ózi qosqan geımderde sátti oınap, toǵyzynshy jáne onynshy geımde qaıyra breık jasap, alǵashqy partııany óz paıdasyna jazdy – 7:5. Ekinshi settiń taǵdyry taı-breıkte sheshildi. Bul synda myqtylyq tanytqan Pýtınseva 7:6 (7:3) esebimen jeńiske jetip, týrnırdiń ekinshi aınalymyna joldama aldy. Ekinshi kezeńde ol álemniń 19-raketkasy qytaılyq Chjen Sınvenmen oınaıdy.