Sybaılas jemqorlyqqa qarsy is-qımyl agenttigi Qaırat Satybaldyulyna jáne basqa da adamdarǵa qatysty júrgizilip jatqan tergep-tekserý aıasynda elden zańsyz shyǵarylǵan aktıvterdi, onyń ishinde qylmystyq jolmen alynǵan aqsha qarajatyn jáne ózge de múlikti qaıtarý jóninde sharalar qabyldap jatyr, dep habarlaıdy Egemen.kz agenttiktiń baspasóz qyzmetine silteme jasap.
«Bıyl mamyr aıynyń sońyna qaraı Sybaılas jemqorlyqqa qarsy qyzmet shet memleketterdiń quqyq qorǵaý organdarymen, halyqaralyq yntymaqtastyqty qamtamasyz etetin Bas prokýratýramen birlesip, Birikken Arab Ámirlikterinen jalpy somasy 14 mln AQSh dollaryn qaıtardy», delingen habarlamada.
Bul qarajat memleket kirisine aınaldyrylyp, áleýmettik maqsattarda paıdalanylady.
Qylmystyq qýdalaý bastalǵannan beri memleketke zańsyz satyp alynǵan Q. Satybaldyuly jáne onymen baılanysty tulǵalardyń 464 mlrd teńgeden astam somaǵa múliktik aktıvteri men aqshalaı qarajattary qaıtaryldy.
Olarǵa ákimshilik ǵımarattar, eksklıýzıvti zergerlik buıymdar, sándi kólikter, qolma-qol aqsha, aksııalar men kompanııalardyń úlesteri, sondaı-aq temirjol kiredi.
Zańsyz shyǵarylǵan aktıvterdi qaıtarý boıynsha jumys jalǵasyp jatyr.