Ana alaqanyndaǵy sábı

Prezıdent Qasym-Jomart Toqaev 2020 jyly «Ańsaǵan cábı» ulttyq jobasyn jarııalady. Baǵdarlamanyń nátıjesinde bedeýlikti ekstrakorporaldy uryqtandyrý (EKU) ádisimen emdeýge jyl saıyn 7 myń kvota bólinedi. Ulttyq jobanyń aıasynda 2021 jyly elimizde 3 myńnan astam bala dúnıege keldi. Demek, osynsha ata-ana perzent súıý baqytyna ıe boldy.

Adamdy meıirimge bóleıtin músinniń ashylý saltanatynda «Ekomed» klınıkalar tobynyń negizin qalaýshy jáne ǵylymı jetekshisi Saltanat Baı­­qoshqarova: «Elimizdegi árbir al­tyn­shy erli-zaıypty bedeýlikke dýshar bolǵan. Resmı statıstıka boıynsha elimizde 21 myńnan asa adamǵa bedeýlik dıagnozy qoıylǵan. Bar qa­­jyr-qaırat, qabiletimdi bedeýlikke qar­­sy kúreske arnaǵan reprodýktıvti medı­sına salasynyń mamany retinde maǵan bul músin jaı ǵana sımvol emes. Biz­diń maqsatymyz – reprodýktıvti medı­sına salasyndaǵy zertteýlerdi, ınno­va­sııalardy qoldaý men damytýdyń mańyz­dylyǵyna qoǵam nazaryn aýdarý. So­­nymen qatar sábı súıýdy ańsap júrgen er­li-zaıyptylarǵa emo­sıo­naldyq kómek pen jan­­ashyrlyq tanytý da mańyzdy», dedi.

Alaqanǵa salynǵan qola sábıdiń músini jańadan ashylǵan «New Generation Clinic» (NGC) halyqaralyq reprodýksııa ortalyǵy ǵımaratynyń qasbetine de erekshe sán berip tur. Aldyn ala jos­parlanǵandaı, ol reprodýktıvti medısına salasyndaǵy qajyrly eńbek pen jetistikterdi beıneleıdi. Ana ala­qanyndaǵy sábıdiń beınesindegi kom­pozısııa reprodýktıvti densaýlyq sala­syndaǵy ǵylymı jańalyqtar men ınno­vasııalardyń mańyzdylyǵyn bil­diredi. Músin – ana bolýdy armandaı­tyn árbir áıeldiń qýaty men náziktiliginiń, senimi men batyldyǵynyń rámizi.

Elimizdegi reprodýktıvti tehnolo­gııalardyń joǵary deńgeıde damýynda EKU ádisiniń negizin qalaǵan Saltanat Baıqoshqarovanyń da úlesi orasan. Ol 1995 jyly 18 sáýirde «Eko­med» atty shaǵyn zerthananyń negizin qalady. 1996 jyly 31 shildede EKU ádisimen Qazaqstanda tuńǵysh ret qyz bala dúnıege keldi. Ýaqyt óte kele shaǵyn zerthana adam reprodýksııasy klınıkalarynyń tobyna aınaldy, elimiz úshin bedeýlikpen kúresetin júzdegen zamanaýı maman daıar­lady, búginge deıin klınıkada 20 myńǵa jýyq sábı dúnıege keldi.

– Reprodýktıvti tehnologııalar úz­diksiz damyp keledi. Men «Ekomed» klınıkalar tobynyń Ortalyq Azııadaǵy ekstrakorporaldy uryqtandyrý sala­syndaǵy kóshbasshyǵa aınalǵanyn maqtan tutamyn. Áý bas­tan-aq otandyq reprodýktıvti me­dısınaǵa sońǵy ja­ńalyqtar men tehnologııalardy engizýdi maqsat etip qoıdym. Osylaısha, NGC zamanaýı halyqaralyq reprodýksııa ortalyǵyn iske qosý ıdeıasy dúnıege keldi. Bul – álemdik standarttarǵa sáıkes jumys isteıtin, eń joǵary sa­nattaǵy qyz­met pen emdeýdi usy­na­tyn jańa býyn klı­nıkasy. Munda eli­mizde alǵash ret jasandy ıntellekt arqyly bedeý­likti emdeýdiń eń zamanaýı ádisteri qolda­nylady, – deıdi S.Baı­qoshqarova.

ALMATY