Túsimen erekshelenip, alystan menmundalap turatyn sary avtobýstardy kezinde amerıkalyq kınofılmderden ǵana kóretin edik. Amerıka Qurama Shtattarynyń úlgisindegi mundaı erekshe kólikter búginde elimizde qurastyrylyp, shalǵaı aýyldarǵa úlestirilip jatqany qýantady. Jýyqta Ertis-Baıan óńirindegi aýyldyq 16 bilim uıasyna zamanǵa saı jabdyqtalǵan jańa qoǵamdyq kólikter tartý etildi.
Jas urpaqtyń alańsyz bilim alyp, oqý ornyna jaıly da qaýipsiz qoǵamdyq kólikpen jetýine memleket tarapynan barynsha kóńil bólinip otyrǵany málim. Halyqaralyq balalardy qorǵaý kúnine oraı óńirdegi aýyldyq 16 mektepke zamanǵa saı jabdyqtalǵan sary avtobýstar berildi. Jańa avtobýstar qaýipsizdik belbeýlerimen, oqýshylardyń rıýkzaktaryna arnalǵan sórelermen, beınekameralarmen jabdyqtalǵan. Múmkindigi shekteýli balalardy salon ishine kóterip kirgizýge arnalǵan tetigi de ınklıýzıvti bilim berýdegi mańyzdy qadamdardy ańǵartsa kerek. Mundaı jaı kótergishtiń ózi aýyldyq jerlerde ózge qatarlastarymen synypta otyryp bilim alǵysy keletin múmkindigi shekteýli jasóspirimder úshin asa qajet. Al avtobýstyń ózi aqyldy júıemen qamtylǵan. Júrgizýshi esikterdiń barlyǵy jabylǵanyna kózin jetkizý úshin salondy mindetti túrde aralap shyǵýy kerek. Olaı etpese, sary avtobýs ornynan qozǵalmaıdy. Kameralar júrgizýshiniń is-qımyly durys bolǵanyn quptap, qozǵaltqyshty iske qosýǵa ruqsat beredi. Al kóliktiń ózi kólemi 3,5 lıtrlik dızeldi motormen qamtamasyz etilgen. Qysta ishi jyly bolýy úshin salonda 6 jylytqysh radıator qoıylǵan.
Mundaı erekshe avtobýstyń biri Baıanaýyl aýdanynyń Qoshke Kemeńgerov atyndaǵy orta mektebine berildi. Shomankól bólimshesinen kelip oqıtyn oqýshylar eski «PAZIK» avtobýstan qutylǵandaryna máz.
– Q.Kemeńgerov mektebi okrýg ortalyǵy – Jumat Shanın aýylynda ornalasqan. Jeti shaqyrym jerdegi Shomankól bólimshesinen 19 bala kúndelikti qatynaıdy. 2017 jyly aýyldyq ákimdikke «PAZIK» markaly avtobýs berilip, osy kúnge deıin oqýshylardy sonymen tasymaldap keldik. Ol kóligimiz de eskirip qaldy. Myna avtobýstyń tehnologııalyq qamtylýy kóńilimizden shyǵyp otyr. Salonynda salqyndatqyshy bar, kún ystyqta balalar mektepke jaıly jetedi. Kólik dızel otynymen júredi eken. Qysta qozǵaltqyshy men janarmaı júıesin aldyn ala jylytyp qoıatyn qurylǵysy da bar. Bul, shynymen de, bizdiń balalarymyzǵa tamasha tartý boldy, – dep qýanyshymen bólisti mektep dırektory Madııan Qabdýova.
Q.Kemeńgerov mektebinde aldaǵy oqý jylynda 104 bala bilim alady dep kútilip otyr. Kópqabatty bilim ordasynyń ǵımaraty eskirip, kóp jyldan beri kúrdeli jóndeýge suranyp turǵan jaıy bar. Oqý uıymyn jónge keltirý jobasyn oblys bıligi keler jyldyń bıýdjetine engizgen eken. Jalpy somasy 329 mln teńgege smeta jasalypty. Joba boıynsha mekteptiń qasbeti, esik-terezeleri jańaryp, edeni qaıtadan quıylady. Qabyrǵalary árlenip, elektr júıesi, ishki jylý júıesi tolyqtaı jańarady.
Al Pavlodar aýdanynyń turǵyny Janna Tatıeva balalary Zańǵar orta mektebinde oqıtynyn, oqýshylardy tasymaldaıtyn eski qoǵamdyq kólik jıi synyp, ata-analar únemi alańdap otyratynyn jetkizdi. Endi qystyń sýyǵy, jazdyń ystyǵynda balalaryn tasymaldaıtyn jaıly avtobýs bar. Oqýshylar kúndelikti sabaqqa barýdan bólek, túrli sport saıysyna, bilim baıqaýyna osy avtobýspen qatynaıdy.
Aıta keteıik, sary avtobýstar Baıanaýyl, Pavlodar, Maı, Ýspen, Aqtoǵaı, Tereńkól, Sharbaqty aýdandaryna jáne Aqsý men Ekibastuzdyń shalǵaı aýyldaryna berildi. Jańa oqý jylyna deıin oblysqa taǵy osyndaı 30 kólik jetkiziledi.
Pavlodar oblysy