Kerekýde kún kúıip tur. Aptap ystyqtan saıa izdegen jetkinshekter sýburqaqtarǵa shomylyp, qyzyqqa batyp júr. Alaıda balanyń sýburqaqta baqylaýsyz júrýine tyıym salynǵanyn kóp ata-ana bilmese kerek. Qaraýsyzdyq saldarynan Aqsý qalasynda 3 jasar qyzdy elektr togy soǵyp, aýrýhanaǵa tústi.
Sońǵy aptada Ertis-Baıan óńirinde turyp alǵan aptap ystyqtan jurt ábden mezi boldy. Kúndizgi ýaqytta synap baǵanasy +40 gradýsqa deıin jetip tur. Jaz bastalmastan mundaı joǵary temperatýranyń turaqty saqtalýy aýa raıy salqyn keletin aımaq turǵyndary úshin qıyndyq týdyryp otyr. Ásirese jazǵy demalysqa shyqqan balalar úıge syımaı, kóshe qýalap oıyn izdep ketetini bar. Mundaı kezde qala ortalyqtaryndaǵy sýburqaqtarǵa shomylyp, qyzyq qýady. О́kinishke qaraı, qadaǵalaýsyzdyqtyń kesirinen jaqynda Aqsý qalasynda sýburqaqqa oınap júrgen 3 jasar búldirshindi elektr togy soǵyp, jetkinshek esinen tanǵan. Ony shahar turǵyndarynyń biri áýpirimdep júrip sýdan alyp shyǵyp, jetip úlgergen jedel járdem qyzmetkerleriniń qolyna tapsyrady. Qyzben birge onyń ápkesi de júr eken. Abyroı bolǵanda, ol aman qaldy.
Aqsý turǵyndary balalar shyǵarmashylyǵy úıiniń aldyndaǵy bul sýburqaqtyń jumysynda kemshilik bar dep esepteıdi. Al nysanǵa jaýapty qalalyq kommýnaldyq sharýashylyq bólimindegiler buǵan deıin sýburqaq úzilissiz jumys istep kelgen dep aqtalyp otyr. Oqys oqıǵa bolǵan kúni tań ertemen sý júıesi mekemesiniń mamany ony teksergen. Baqsaq, bul sýburqaqty jóndeýge jáne ustap turýǵa qala ákimdigi bıyl eki márte konkýrs jarııalap, ekeýi de ótpeı qalǵan. Sondyqtan kommýnaldyq bólimdegiler sý taratý mekemesiniń qyzmetkerlerin shaqyryp, maýsym aıynyń alǵashqy kúnderinde iske qosady. «Bul kúni sýburqaq qalypty istep turǵan. Eshqandaı toq kerneýi tirkelgen joq. Mundaı jaǵdaı bolatynyn eshkim kútpegen edi. Oıda joq jerden sý sorǵynyń qozǵaltqyshyna túsip, qysqa tuıyqtalý júrgen. Sóıtip, elektr tolqyny álgi qyz bala oınap júrgen tuspen ótken. Sýburqaqta shomylyp júrgen ózge balalar zardap shekken joq», deıdi Aqsý qalalyq turǵyn úı-kommýnaldyq sharýashylyǵy, jolaýshylar kóligi jáne avtokólik joldary bóliminiń basshysy B.Azamatov.
Qazirgi kúni polıseıler atalǵan jaıt negizinde Qylmystyq kodekstiń 254-baby («Mindetterine adal qaramaý») boıynsha is qozǵaǵanyn aıtý kerek. Tergeý-tekserý sharalary aıaqtalǵan soń kináliler tulǵalar jaýapqa tartylady dep sendirip otyr tártip saqshylary.
Aıta keter bir jaıt, oqıǵa kezinde 3 jasar balaqaı men onyń ápkesi úlkenderdiń baqylaýynsyz júrgen. Jalpy, sýburqaq – shomylatyn jer emes. Eger onda jaryq shamdary ornalasqan bolsa, tipti qaýipti. Elektr kabelderiniń oqshaýlanǵan tustary keıde jyrylyp, sý tıetini bar. Sondyqtan balalardyń ondaı jerlerde qaraýsyz júrmeýin ata-analar únemi qadaǵalaýǵa tıis.
Pavlodar qalalyq prokýratýrasynyń aǵa prokýrory Ásel Beısenbaeva sýburqaqtarda balany baqylaýsyz qoıa bergeni úshin ata-analar Ákimshilik quqyq buzýshylyq kodeksiniń 127-baby boıynsha jaýapqa tartylatynyn eskertedi. Bul – balaǵa durys tárbıe bere almaý jáne oǵan tıisti kútim jasaı almaýmen teńestirilgen jaǵdaı bolyp esepteledi. Eresekterge 10 AEK mólsherinde, bir jyl ishinde qaıtalanǵan jaǵdaıda 15 AEK kóleminde aıyppul salynatynyn bilý kerek.
Aqsýdaǵy jaǵdaı Pavlodar qalasynyń bıligi men tártip saqshylaryna sabaq bolsa kerek, shahardyń sýburqaqtarynda baqylaýsyz júrgen balalardy anyqtaý boıynsha birlesken reıd bastalyp ketti. Oblys ortalyǵynda 20-ǵa jýyq sýburqaq bar. Qalalyq bilim berý bóliminiń basshysy Qýanysh Qydyrálın úı úlkenderinen jaz ýaqytynda balalardy baqylaýsyz qaldyrmaýdy surap otyr. Sebebi sýburqaqtar ǵana emes, ashyq sý aıdyndary, úı terezeleri de qaýip kózi. Eriktiler men qutqarýshylar bir kún ishinde ózende qaraýsyz shomylyp júrgen 15 jasóspirimdi úılerine qaıtarǵan. Tilsiz jaý balalardy qoıyp, eresekter úshin de óte qaýipti. О́tken aptada ǵana Ekibastuzda ruqsat etilmegen jerde sýǵa túsken er adam batyp ketti. Mundaı qaıǵyly jaǵdaılar qaıtalanbas úshin jabdyqtalmaǵan jaǵalaýlarda sýǵa túsýge bolmaıtynyn aıtady mamandar.
Pavlodar oblysy