«Amanat» partııasy janyndaǵy Sybaılas jemqorlyqqa qarsy is-qımyl jónindegi respýblıkalyq keńestiń jumys toby Astana qalasynda salynyp jatqan «JEO-3» qurylysyna arnaıy baryp, partııalyq baqylaý júrgizdi. Onyń quramyna Májilis depýtattary, Bas prokýratýranyń, Astana ákimdiginiń, Qarjy monıtorıngi agenttiginiń, Sybaılas jemqorlyqqa qarsy is-qımyl agenttiginiń ókilderi kirdi.
Qurylysy júrip jatqanyna on bes jyldaı bolǵan jylý-elektr ortalyǵynyń paıdalanýǵa berý merzimi birneshe ret keıinge shegerilgen. Degenmen joba merdigeri «SentrKazEnergoMontaj» AQ-nyń aqparaty boıynsha, alǵashqy eki qazandyq bıyl qazan aıynda iske qosylyp, al JEO-nyń ózi jyl sońyna deıin paıdalanýǵa berilmek. Búginde nysanda 17 qosalqy merdigerlik uıymnan 600-den astam adam eki aýysymmen jumys istep jatyr. Tehnıkalyq aýdıt derekterine sáıkes, nysandaǵy jumystyń 83%-y bitken. Atap aıtqanda, sý jylytý qazandyqtaryn, qyzdyrǵyshtar men jelilik sý qubyrlaryn montajdaý jumysy aıaqtaldy. Sondaı-aq Indýstrıaldy parkten «JEO-3»-ke deıin tehnıkalyq sý qubyry salynǵan. Biraq jylý-elektr stansasyn iske qosý úshin áli de atqaratyn sharýa shashetekten. Gaz taratý jelilerin júrgizý, sý jylytý qazandyǵynyń jeldetý jáne aýany baptaý júıesin jolǵa qoıý, syrtqy jáne ishki ınjenerlik jeliler jumysy kútip tur. Búginde qubyrlardy oqshaýlaý, sondaı-aq nysandy basqarý jabdyqtaryn ornatý jáne sýdy syǵymdaý jumysy jalǵasyp jatyr.
Inspeksııa barysynda partııa ókilderi elordada JEO qurylysy belgilengen merzimde atalmasa, qysta jylý tapshylyǵy týyndaýy múmkin ekenin atap ótti. Taǵy bir másele, sońǵy 15 jyl ishinde buryn satyp alynǵan jabdyqtyń bir bóligi eskirip, qoldanýǵa jaramsyz bolyp qalǵan.
«Merdigerler nysannyń 83%-y daıyn ekenin aıtady. Barlyq qazandyq ázir, qubyrlar qalanyń negizgi magıstraline qosylǵan dep otyr. Alaıda biz jumystardyń 83%-y atqarylmaǵanyn kórip otyrmyz, óıtkeni áli de jasalynýǵa tıis is kóp. Sondyqtan biz aı saıyn baqylaý júrgizip, jumystyń qalaı júrip jatqanyn tekseremiz. Bul máseleni ákimdik jáne mınıstrlikterdiń ókilderimen talqylap, jan-jaqty baqylaý jasaımyz. Eger nysan ýaqytynda salynyp bitpese, elordada jylý energııasy tapshylyǵy týyndaýy múmkin», dedi Erlan Saırov.