Búgin Astana tórindegi «Barys Arenada» dzıýdodan Qazaqstan Barysy Grand Slam álemdik týrnıriniń sońǵy jarys kúni ótti, dep habarlaıdy Egemen.kz Qazaqstan dzıýdo federasııasynyń baspasóz qyzmetine silteme jasap.
Qazaqstan qurama komandasy bul jarysta 1 altyn, 1 kúmis, 5 qola medal enshilep, 42 eldiń arasynda jalpykomandalyq esepte 4 orynǵa ıe boldy.
«Keremet sezimdemin, óz elimizde ótip jatqan baıraqty jarysta altynǵa qol jetkizý – mańdaıyma jazylǵan baqyt shyǵar. Qýanyshymdy sózben aıtyp jetkizý múmkin emes. Golden skor segiz mınýtqa sozylsa da, sharshaǵanym sezilmeıdi. Qarsylasymmen bir-birimizdiń qyr-syrymyzdy bilip, ábden namysqa salyp kúrestik. О́z elimizde ótetin jarysqa psıhologııalyq turǵyda jaqsy daıyn boldym. Meni qoldaǵan barsha qazaq eline alǵysym sheksiz», dedi chempıon atanǵan Maǵjan Shamshadın.
Úsh kúnge sozylǵan álemdik dodada Qazaqstan sapynan 60 kelige deıingi salmaq dárejesinde Maǵjan Shamshadın chempıon atanyp, Ǵusman Qyrǵyzbaev (-66 kg) kúmis júlde enshilese, Danııar Shamshaev (-73 kg), Asqar Narqulov (-73 kg), Islam Bozbaev (-100 kg), Ǵalymjan Qyryqbaı (+100 kg) jáne Aqerke Ramazanova (+78 kg) jeńis tuǵyrynyń úshinshi satysyna kóterildi.
Ǵalııa Tynbaeva (-48kg), Jansaı Smaǵulov (-73 kg) pen Bekarys Sádýaqas (-100kg) kishi fınalǵa deıin jetip, 5 orynǵa turaqtady.
«Qazaqstan barysy Grand Slam jarysy tájirıbeli jáne jas dzıýdoshylar úshin óte keremet alań boldy. Jarys nátıjesine qarap, bizdiń quramada býyn almasyp jatqanyn jáne ártúrli salmaq arasynda el ishinde básekeniń artyp jatqanyn baıqaýǵa bolady.
Jarys óz jerimizde ótip jatqandyqtan jaýapkershilik júgi eki ese boldy. Keıbir dzıýdoshylar óz qatelikterinen medalǵa qol sozym jerden toqtasa, keıbireýleriniń baptary men baqtary qatar shappady.
Bizdiń sportshylarymyzǵa qoldaý bildirip kelgen barlyq jankúıerlerge rahmet aıtamyn jáne biz áli de sizderdiń úmitterińizdi aqtaý úshin kóp eńbek etetin bolamyz», dedi dzıýdodan Qazaqstan erler ulttyq quramasynyń bas bapkeri Nurbol Súleımenov.
Qazaqstan dzıýdo federasııasynyń bas hatshysy álemdik jarystyń uıymdastyrylýyn halyqaralyq mamandar tarapynan joǵary baǵalanǵanyn atap ótti.
«Qazaqstan barysy Grand Slam» jarysynyń uıymdastyrylýy Halyqaralyq dzıýdo federasııasy tarapynan joǵary baǵalandy. Munda tek sportshylar emes, dzıýdo sportynyń aınalasynda júrgen árbir menedjer tájirıbe alyp úlgerdi. Biz osy ýaqytqa deıin Azııa jáne álem chempıonattaryn, Gran-prı jáne Masters jarystaryn, sondaı-aq jasóspirimder arasyndaǵy álem chempıonatyn ótkizgen edik. Endi tájirıbemizge álemdik Grand Slam básekesi qosyldy.
Álemdik jarys aıaqtalǵannan keıin biz birneshe komandamen birge halyqaralyq oqý-jattyǵý lagerin ótkizemiz. Onda tek ulttyq qurama sportshylary emes, jastar quramasynyń ókilderi de qatysyp, sheteldik sportshylarmen birge jattyǵý múmkindigine ıe bolady.
Sportshylar men bapkerlerge, demeýshilerimiz ben seriktesterimizge, osy jarysty uıymdastyrýǵa atsalysqan árbir sport salasynyń qyzmetkerlerine, menedjerlerge, medısına mamandaryna, ár eriktige, osy jarystyń bas-qasynda júrgen ár mamanǵa bas ıip, alǵysymdy bildiremin. Barlyǵymyzdyń jumyla jasaǵan jumysymyzdyń jemisin kórip otyrmyz. Barshańyzǵa iske sát!», dedi bas hatshy Ashat Jitkeev.
Aıta keterligi, Halyqaralyq dzıýdo federasııasynyń kúntizbesine engen «Qazaqstan barysy Grand Slam» ataýymen engen bul jarysqa barlyǵy 42 elden 340 sportshy qatysty.
Bul dodanyń nátıjesinde IJF erejelerine sáıkes jarystyń jeńimpazdary men júldegerleri arasynda Álemdik jáne olımpıadalyq reıtıngterde upaılar bólindi. Atap aıtqanda, 1 oryn úshin 1000, 2 oryn úshin – 700, al 3 oryn úshin – 500 upaıdan berildi.
«Qazaqstan barysy Grand Slam» týrnırinde dzıýdoshylar 2024 jyly Parıjde ótetin jazǵy olımpıada oıyndaryna qatysý úshin upaı jınady.
Esterińizge sala ketsek, Qazaqstan dzıýdo federasııasy men Halyqaralyq dzıýdo federasııasynyń (IJF) ekijaqty kelisimshartyna sáıkes, Qazaqstan álemdik Grand Slam jarysyn 2023-2026 jyldar aralyǵynda qabyldaıdy.