Ulttyq testileý ortalyǵynyń dırektory Rýslan Emelbaev bıylǵy UBT-da bilimderin synaǵan mektep túlekteriniń «kreatıvti shpargalkalary» jaıly sóz qozǵap, talapkerlerge úndeý joldady, dep habarlaıdy Egemen.kz.
Rýslan Emelbaev usynǵan resmı derekterge sáıkes, jyl saıyn UBT-daǵy ereje buzýshylardyń sany azaıyp kele jatyr. Máselen, 2019 jyly testileýge kirgizý barysynda 128 myń, 2020 jyly – 2522, 2021 jyly – 756, 2022 jyly – 327 tyıym salynǵan zat anyqtaldy. Mundaǵy kórsetkish 400 esege azaıǵanyn baıqaýǵa bolady. UTO dırektorynyń aıtýynsha, bul talapkerlerdiń óz bilimderine senip, akademııalyq adaldyq erejelerimen jaqsy tanys ekenin kórsetedi.
«Dese de, saqtyqta qorlyq joq dep shpargalkalarǵa júginetin talapkerler áli de bar. UBT-nyń 5 aptasy boıynsha «eń kreatıvti shpargalardy» osy jazbada usynyp otyrmyn. Talapkerlerdiń ókinishine qaraı, bizdiń qyraǵy baqylaýshylardy aldaý múmkin bolmady. Balalardyń erekshe shyǵarmashylyq jumystary birden anyqtaldy», dep jazdy Rýslan Emelbaev óziniń Instagram paraqshasynda.
Onyń aıtýynsha, ótken jyly postmonıtorıng nátıjesinde 200-den astam talapkerdiń nátıjesi joıyldy, onyń ishinde 137-i grant ıegeri bolǵan. Bıyl da bul jumys óz jalǵasyn tabady.
«Negizgi 2023 jylǵy UBT-nyń máre syzyǵyna 2 apta qaldy. Taǵy bir márte talapkerlerdi akademııalyq adaldyq prınsıpterin saqtaýǵa shaqyramyn. Jetistikke jetýdiń basty sharty bilimdi bolý ekenin umytpańyzdar. Sáttilik!», dep túıindedi Rýslan Emelbaev.