Prezıdent Qasym-Jomart Toqaevtyń Jarlyǵymen Almaty oblysynyń ortalyǵy Qonaev qalasyna qonys aýdarǵaly beri óńirdiń tynys-tirshiliginen habardar etýdi maqsat tutqan jańa basylym jaryqqa shyqqan edi. Almaty oblystyq qoǵamdyq-saıası gazet «Alataý araıy» dep atalady.
Baspasózdiń búgingi óliara shaǵynda ómirge kelgen bul basylym negizinen 105 jyldyq tarıhy bar «Jetisy» gazetiniń shekpeninen shyqty. О́tken jyldyń qyrkúıek aıynan bastap atalǵan basylymnyń qosymshasy retinde tanyla bastaǵan «Alataý araıy» jańa jyldan beri óz aldyna derbes basylym bolyp, óńirdiń kóziqaraqty oqyrmanynyń rýhanı azyǵyna aınalyp keledi.
«Buqaralyq aqparat quraldary básekege qabiletti jáne erkin bolýy kerek. Bul qaǵıdat qazir kez kelgen órkenıetti el úshin aıryqsha mańyzdy. Otandyq aqparat quraldarynyń Qazaqstanda, óńirde jáne álemde bolyp jatqan úderister týraly óz kózqarasy bolýǵa tıis», degen Memleket basshysynyń tapsyrmasyn basshylyqqa alǵan basylym áleýmeti men áleýeti artyp kele jatqan Almaty oblysynyń sát saıynǵy ilgerileý jolyndaǵy jańalyqtarynyń jarshysyna aınaldy. Jyl basynan beri 71-nómiri jaryqqa shyqqan gazettiń baǵyt-baǵdary aıqyn.
– «Alataý araıy» derbes basylym retinde oqyrman qolyna tıe bastaǵanyna alty aı boldy. Adam ómirimen salystyrsaq áli ińgálaǵan náreste shaqta. Desek te «ińgálaǵan» qalpymyzben aımaqtyq, odan bólek respýblıkalyq deńgeıde basylymdar kósh-kerýenine kúmistelgen bolmasa da kúıme jaldap, ilesken jaı bar. Respýblıkalyq deýimniń sebebi, Aqordaǵa únimiz jete bastady. Túrkistan oblysynan tartyp, Ekibastuzǵa deıin tam-tumdap oqyrmandarymyz bar. Taralym 7 myńdyq deńgeıge jetip jyǵyldy. Ujymnyń shyǵarmashylyq, tehnıkalyq quramy tolyq qalyptasyp, judyryqtaı jumylyp iske kirisip jatyr. Jýrnalısterimizdiń turmystyq jaǵdaıy men redaksııanyń materıaldyq-tehnıkalyq bazasy maqtanarlyq dárejede emes. Úmiti úzilmegen jurtpyz ǵoı. Jańa, jas oblys ortalyǵynyń erteńine sengendikten uıymshyl ujymymyzdyń eńsesi kóterińki, – deıdi «Alataý araıy» gazetiniń bas redaktory Kádirbek Qunypııauly.
Aqparat salasyndaǵy jaýapkershiligi mol júkti arqalap, Alataýdyń jylt etpe jańalyǵyn shartarapqa taratýda tynym tappaıtyn qalamy qarymdy Qýat Qaıranbaev, Qýanysh Tunǵatar, Serik Satybaldıev, Alma Esenbaı, Bolat Májıt, Quralbek Sábıtov syndy «Jetisy» gazetinen tanymal saqa jýrnalıster qatary búginde tájirıbeli Aıjaryq Kóptileýov, Beıbit Mekeev, jas tilshi Baıan Muratbekqyzy jáne aýdandardaǵy menshikti tilshilermen tolyǵyp, basylym mazmunynyń arta túsýine úlesterin qosyp keledi. Basylymnyń mazmunyn aıshyqtaýda fototilshi Aslan Qajekeniń izdenisi óz aldyna bir tóbe.
Merzimdi basylymnyń ýaqtyly ári sapaly shyǵýynda qalamdy qarý etken jýrnalıstermen qatar, esepshi Jaýhar Amankeldıeva, jaýapty hatshy Sholpan Nurjaýova, terimshi Janat Toqanova bastaǵan tájirıbeli mamandarmen qatar, bilikti betteýshiler, saýatty korrektorlar eseli eńbek sińirip júr. Sondaı-aq gazettiń elektrondy saıty jandanyp keledi.
Internet qaryshtap damyǵan zamanda maǵynaly, mazmundy maqalalar arqyly ultymyzdyń rýhyn asqaqtatyp, buqaraǵa órkenıet pen eldik murattardy dáriptep, birlik pen berekeni nasıhattaıtyn jańa basylym – «Alataý araıy» gazetine sáttilik tileımiz.
Almaty oblysy