Memleket basshysy Qasym-Jomart Toqaev Qazaqstanǵa resmı saparmen kelgen Lıýksembýrg Uly Gersogtiginiń Syrtqy jáne Eýropa isteri jónindegi mınıstri Jan Asselborndy qabyldady, dep habarlaıdy Egemen.kz Aqorda baspasóz qyzmetine silteme jasap.
Prezıdent Jan Asselbornǵa iltıpat bildire otyryp, onyń bul sapary kóptegen sala boıynsha ekijaqty yntymaqtastyqty odan ári damytý úshin jańa múmkindikterge jol ashatynyn atap ótti.
Memleket basshysy Lıýksembýrg Premer-mınıstri Ksave Bettelmen BUU Bas Assambleıasynyń 77-shi sessııasy alańynda ótken kelissózderin eske aldy.
«Sol kezde Qazaqstan men Lıýksembýrg arasyndaǵy ózara tıimdi seriktestikti damytýdyń uzaqmerzimdi perspektıvalary týraly óte tabysty ári mazmundy áńgime boldy. Qazaqstan Sizdiń elińizdi jáne halqyńyzdy qurmetteıdi. Biz ózara yntymaqtastyǵymyzdyń bolashaǵyna senemiz», dedi Qasym-Jomart Toqaev.
Kezdesý barysynda olar kólik jáne logıstıka, sıfrlandyrý, «jasyl» energetıka salalaryndaǵy, sondaı-aq Astana halyqaralyq qarjy ortalyǵy aıasyndaǵy ózara is-qımyl perspektıvalaryn qarastyrdy.
Jan Asselborn eki el arasyndaǵy qarym-qatynastardyń qarqyndy damyp kele jatqanyn atap ótti.
«Búgin tańerteń biz ózara túsinistik týraly eki memorandýmǵa qol qoıdyq. Qazirgi ýaqytta Cargolux Qazaqstanǵa apta saıyn 21 reıs jasaıtynyn bilesiz. Sondaı-aq Lıýksembýrg mýltımodaldy hab sanalady. Osyǵan baılanysty Astana áýejaıy – biz úshin óte mańyzdy pýnkt. Lıýksembýrg kompanııasy birlesken osy iri jobany júzege asyra alatynyna rızashylyǵymdy bildiremin. Sıfrlyq damý, ınnovasııalar jáne aeroǵarysh ónerkásibi mınıstrimen ózara túsinistik týraly ekinshi memorandýmǵa qol qoıdyq», dedi mınıstr.
Sonymen qatar Qasym-Jomart Toqaev pen Jan Asselborn halyqaralyq jáne óńirlik kún tártibindegi ózekti máseleler jóninde pikir almasty.