Atyraýda qarjy pıramıdasyn qurý jáne basqarý kúdigimen eki kompanııaǵa qatysty tergeý júrip jatyr, dep habarlaıdy Egemen.kz.
Qarjylyq monıtorıng agenttigi Atyraý oblysy boıynsha ekonomıkalyq tergep-tekserý departamentiniń shtab bastyǵy Bekbolat Ánesovtiń aıtýynsha, jyl basynan beri qarjy pıramıdasyn qurýǵa baılanysty 3 derek anyqtalǵan.
«Departament qyzmetkerleri turǵyndardy aldap-arbaýdyń aldyn alý úshin monıtorıng júrgizip keledi. Monıtorıngtiń nátıjesinde bıylǵy bes aıda qarjy pıramıdasyna qatysty 3 derek áshkerelenip otyr. Qazir «Chia Tai Tianging» jáne «InCruises» JShS-ǵa qatysty qarjylyq (ınvestısııalyq) pıramıdany qurý jáne oǵan basshylyq etý deregimen qozǵalǵan qylmystyq is tergelip jatyr», dep málim etti Bekbolat Ánesov.
Onyń aıtýyna qaraǵanda, Qarjylyq monıtorıng agenttigi qarjy pıramıdasy retinde áreket etý kúdigine ilingen, sondaı-aq sot úkimi shyqqan uıymdardyń keńeıtilgen tizimin jarııa etken.
«Osyǵan baılanysty oblys turǵyndary men qonaqtarynan týysqandary, ne jaqyn tanystary qarjy pıramıdasynyń áreketinen zardap shekse, Atyraý oblysy boıynsha ekonomıkalyq tergep-tekserý departamentine habarlasý suralady. Azamattardy qyraǵy bolýǵa, aqshalaı jınaǵyn kúmándi qarjy ınstıtýttaryna salmaýǵa shaqyramyz», dedi B. Ánesov.