Aqmola oblysynyń dıqandary egis alqaptaryn oılap, shaǵymdaryn aıtýda. Buǵan aqbókender sebep bolǵan. Olardyń shabýylynan astyq egetin Atbasar, Astrahan, Qorǵaljyn, Jarqaıyń, Egindikól, Selınograd syndy aýdandary úlken shyǵynǵa ushyrap jatyr, dep habarlaıdy Egemen.kz.
Búginde aýyl sharýashylyǵy óndirýshileri egis jumystaryna mıllıondaǵan qarajat salady. О́z alańdaryn aqbókenderden qorǵaý úshin kásipkerler turaqty kezekshilik uıymdastyrýǵa májbúr. Muny isteý úshin olar jeke kólik, adamdardy bólýi kerek. Bul fermerler úshin qosymsha shyǵyn men qarjylaı júkteme ekeni belgili.Aıta ketsek, Qazaqstanda aqbókenderdi aýlaýǵa tyıym salynǵan. О́ıtkeni kıeli janýar IýNESKO-nyń qorǵaýyna alynǵan.
«Atameken» UKP baspasóz qyzmeti habarlaǵandaı, fermerler egisterdi Qyzyl kitapqa engen janýardyń shabýylynan da saqtandyra almaıdy, óıtkeni búginde mundaı saqtandyrý túri joq.
Bul rette, aýyl sharýashylyǵy óndirýshileriniń qarjy ınstıtýttary aldynda aǵymdaǵy nesıelik mindettemeleri bar. Ýákiletti organdardyń áreketsizdigi kezinde bul fermerlerdiń qarjylyq jaǵdaıyn odan ári nasharlatýy múmkin.О́tken jyly oblystyń aýyl sharýashylyǵy taýaryn óndirýshiler jalpy alymda da, materıaldyq turǵyda da úlken shyǵynǵa ushyrady. Aqbókenderdiń aýyl sharýashylyǵy daqyldaryn búldirýinen keltirilgen zalal 8 mlrd teńgeden asty (1 ga úshin 55 myń teńge esebinen). Máselen, Egindikól aýdanynda 45 myń gektardan astam, Astrahan aýdanynda – 22 myń gektardan astam, Jaqsy aýdanynda – 19 myń gektarǵa jýyq, Jarqaıyń aýdanynda – 10 myń gektarǵa jýyq egis alqaby búlindi.
Jarqaıyń aýdanyndaǵy eń iri sharýa qojalyqtyń ıesi Temirhan Jangeldınniń aıtýynsha, bıyl aqbókender odan da kóp.
«Olardyń taralý aımaǵy artty, aqbókender bizdiń aýdannyń aýmaǵyna etene endi. Biz vagondardy qorshaý alańdaryna qoıamyz, kvadrosıkldardy satyp aldyq, janýarlardy aıdaý úshin adamdardy jaldaımyz, biraq nátıje joq. Bul jaǵdaıdy qurǵaqshylyq ta nasharlatyp otyr. Ol daqyldarǵa áser etedi, al aqbókender onsyz da álsiz daqyldy taptap jatyr», dep shaǵymdandy fermer.
Aqmola oblysynyń kásipkerler palatasynyń sarapshylary birqatar usynys jasady. Atap aıtqanda, ýákiletti organdar, «Ohotzooprom» О́B» RMQK mamandandyrylǵan uıymynyń kúshimen aqbókenderdiń sanyn retteýdi usyndy.
«Aqbókenderdiń kóshi-qony jolynda mamandandyrylǵan jem-shóp alańdaryn anyqtaý boıynsha jumysty jolǵa qoıý, qorshaýdy daıyndaý jáne ornatý úshin respýblıkalyq bıýdjetten qarajat kózdeý qajet. Sondaı-aq ortalyq deńgeıde aqbókenderdiń keltirgen zalalyn baǵalaý úshin quzyretti memlekettik organdardyń ókilderi men táýelsiz sarapshylar qatarynan komıssııa qurý, zalaldy óteý úshin memlekettik qazynadan qarajat bólý múmkindigin qarastyrý qajet», dep sanaıdy О́ńirlik kásipkerler palatasynyń AО́K bóliminiń bastyǵy Jaısan Bekqojın.