Túrkistan oblysynda «Jaıly mektep» ulttyq jobasy aıasynda salynatyn 63 mekteptiń qurylysy barysynda otandyq materıaldar qoldanylady, dep habarlaıdy Egemen.kz El.kz aqparat agenttigine silteme jasap.
Atalǵan joba aıasynda salynatyn 63 mekteptiń 29-ynyń qurylysy bıyl bastalyp, kelesi jyly aıaqtalady. Al qalǵan 34 mekteptiń qurylysy 2024 jyly bastalady.
Mektepterdiń qurylysyna otandyq materıaldar qoldanylatyny óz aldyna, oǵan qosa, jergilikti óndirýshilerge basymdyq beriledi. Árbir mekteptiń qurylys materıaldary qatań baqylanyp, arnaıy standart bekitiledi.
Túrkistan oblysynyń ákimi Darhan Satybaldy Túrkistandaǵy №28 mektep-lıseıinde uıymdastyrylǵan kórmege arnaıy baryp, «Jaıly mektep» jobasyna qoldanylatyn qurylys materıaldary men mektep jıhazdarynyń jobalarymen tanysty.
- «Jaıly mektep» – Memleket basshysy Qasym-Jomart Kemelulynyń tikeleı baqylaýynda turǵan joba. Árbir mekteptiń qurylysy óte sapaly ári josparǵa saı salynýy tıis. О́ńirde ulttyq jobany júzege asyrý baǵytynda jumys tobyna ár mekteptiń qurylysyn muqııat qadaǵalaýdy tapsyramyn. Balalarymyzdyń alańsyz bilim alýyna, ustazdarymyzdyń joǵary deńgeıde jumys isteýine jaǵdaı jasalýy qajet. Oǵan múmkindik te, jaǵdaı da bar. Oblystyń jıhaz jáne qurylys materıaldaryn shyǵaratyn kompanııalaryna, jumysshylaryna basymdyq berilýi tıis. Olardyń áleýeti jetpese, qosymsha ózge óńirlerdegi otandyq óndirýshilermen kelisim jasalyp, jobalar óz merziminde júzege asýy kerek, – dedi ákim.
Oblys ákimi qurylys materıaldary men mektep jıhazdaryn óndiretin kompanııa ókilderimen kezdesip, usynystary men pikirlerin tyńdady.
Kórmede mektepterge qajetti jıhazdar, mektep qurylysynda qoldanylatyn materıaldar týraly maǵlumattar berildi. Barlyq 63 mektepke arnaıy standart bekitiletini, merdigerler sol erejege saı jumys isteıtindigi aıtyldy. Mektep dırektorlary men bilim sarapshylaryna Túrkistan oblysynyń jáne ózge óńirlerdiń jıhaz shyǵaratyn kompanııalary óz ónimderin usyndy.
63 mektepke partalar, oryndyqtar, ustazdarǵa arnalǵan ústelder, shkaftar, ashanaǵa qajetti ústelder men oryndyqtar, taqtalar, keńse oryndyqtary jáne ózge de jıhazdar qajet. Qajettilikti óteý maqsatynda Túrkistan oblysy ákimdiginiń atalǵan sala boıynsha jaýapty basqarmalary oblystaǵy jáne elimizdiń ózge oblystaryndaǵy otandyq kompanııalarmen kelissózder júrgizip, aldyn ala memorandýmdar jasamaq, bul baǵalardyń qymbattaýynyń aldyn alýǵa da múmkindik beredi.
Qajetti jıhaz kólemi aýqymdy bolýyna baılanysty Túrkistan oblysynda jıhaz shyǵaratyn kásiporyn ashylady dep josparlanyp otyr.