О́risi malǵa, qoınaýy janǵa tolyp, berekesi artqan Kúrkeli elinde, Alash ardaqtysy Jumat Shanın týǵan aýylda dúbirli toı ótti. Bul kúni eldi mekende jastar ortalyǵy men ashana, oıyn alańdary ashylyp, aýyldyqtar qýanyshqa bólendi.
Bıyl Jumat Shanın aýylynyń qurylǵanyna 60 jyl tolyp otyr. Keńes ókimeti jyldary munda aýyl sharýashylyǵy qýatty damyp, aýmaqta mal basy eselep artyp, egin ósirý, jem-shóp daıyndaýda zor jetistikterge qol jetkizdi. Munyń barlyǵy sol kezdegi eńbekshil aǵa býynnyń tabandylyǵynyń arqasynda kelgen edi.
Táýelsizdikten keıin ózge qazaq aýyldary sııaqty toqyraýdy ótkergen meken búginde Alash ardaqtysynyń esimine saı tútinin túzetýge bet burǵan. «Aýyl – el besigi» baǵdarlamasy aıasynda aýylǵa aparatyn úlken jolǵa asfalt tóselip, ortalyqtandyrylǵan aýyzsý qubyryn tartý bastaldy. Jergilikti aqsaqal Ratbek Ashýev atap ótkendeı, aýyl jastarynyń uıymshyldyǵy arqasynda keleli ister atqarylýda. Jalpy, ult densaýlyǵynyń myqty bolýy salamatty ómir saltyna, sportqa baılanysty ekeni belgili. Memleket basshysy Qasym-Jomart Toqaev jyl saıynǵy Joldaýlarynda balalar men jastardyń densaýlyǵyn jaqsartý úshin damyǵan jáne qoljetimdi sport ınfraqurylymynyń bolýy mańyzdy ekenine únemi toqtalady. Ásirese, aýyldyq jerlerde sportty damytýǵa kóńil bólýdiń mańyzy zor.
«Memlekettiń kómegin kútip otyrmaı-aq, ózderiniń kúsh-jigerimen, adal eńbegimen jergilikti jastardy sportqa, salamatty ómir saltyna baýlyp júrgen azamattarǵa qarap rıza bolamyz. Mine sonyń bir jarqyn úlgisi – búgingi merekede ashylyp otyrǵan jastar ortalyǵy men fýtbol jáne basketbol alańdary. Ortalyq aýyl jastarynyń sportpen, salamatty ómir saltymen turaqty shuǵyldanýyna múmkindik beredi. Osy ıgi istiń basy-qasynda bolǵan jandardyń barlyǵynyń atyn atap, túsin tústeýdiń qajeti shamaly. El onsyz da bul azamattarymyzdyń eńbegin jaqsy bilip otyr» dep rızashylyǵyn jetkizdi Ratbek aqsaqal. Jańa ashylǵan jastar ortalyǵynda keleshekte kúres túrleri, ústel tennısi jáne sporttyń ózge de túrleri úıretilip, aýyldaǵy jas azamattardyń bos ýaqytyn tıimdi paıdalanýǵa, olardyń boıyn teris ádetterden aýlaq salýǵa jol ashady. Ǵımarat jergilikti turǵyndar men syrttaǵy qamqorshylardyń jınaǵan qarajatyna boı kótergen.
Bul kúni halyqty ımandylyqqa uıytyp otyrǵan aýyldyq meshit janynan jańa ashana jumysyn bastady. Aýyl ımamy Rústem Ábdı ashana aýyl turǵyndarynyń túrli as-jabdyǵyn ótkizýge múmkindik beredi deıdi. Zamanǵa saı jıhazben, aspazdyq jabdyqtarmen qamtylǵan ǵımarat Baıanaýylǵa tanymal mesenattyń qarjysyna turǵyzyldy.
Shildeniń shilińgir ystyǵyna qaramastan, alystan at terletip jetken toıshyl qaýymdy aýyl jurty úkilep kútip aldy. Aýyl balalary bul kúni shaǵyn fýtbol men asyq atý saıystaryna qatysyp máz-meıram bolsa, jastar men eresekter arqan tartys, kir tasyn kóterý, qazaq kúresi, qashyqtyqqa júgirý básekelerinde baq synady. Jergilikti ónerpazdar men syrttan kelgen óner ıeleri uıymdastyrǵan mádenı sharalar da el kóńilinen shyqty. Aýyldyń toıy báıgesiz ótken be, irgedegi «Báıgetóbede» keshkisin tuıaǵy jer tarpyǵan tulparlardyń ónerine tánti boldyq.
Jumat Shanın eldi mekeni – ulylardyń izi men sózi qalǵan kıeli ólke. Ataqty ánshi Jarylǵapberdi Jumabaıuly, qazaqtan shyqqan tuńǵysh kásibı rejısser Jumat Shanın, esimi qazaqqa ǵana emes, odaqqa tanymal óner ıeleri Qalı Baıjanov, Aqysh Shanın, Atyǵaı Shanın, Alash qaıratkerleri Sálemhat Kúlenov pen Ahmetolla Barlybaev, ataqty kentanýshy, «tastyń tilin túsingen qazaq» Qosym Pishenbaev osy mekende dúnıege kelgen. Bizder qut-berekesi men yntymaǵy uıyǵan aýyl azamattarynyń birlikshil tirligine rıza bolyp qaıttyq.