Qazaqstanda zańsyz júrgen Nıgerııa men Brazılııa azamattary anyqtaldy. Polısııa qyzmetkerleriniń habarlaýynsha, Nıgerııanyń 12 azamaty el aýmaǵynda tıisti ruqsatsyz jumys istegen, dep jazady Egemen.kz.
Polisia.kz jazýynsha, bir aptada basqa elderdiń 50 azamaty jáne kórshiles elderdiń 165 azamaty ákimshilik jaýapkershilikke tartyldy.
«104 shetel azamaty qujattarynyń bolmaýyna baılanysty qabyldap-taratýǵa ornalastyryldy. Taǵy 22 shetel azamaty Qazaqstannan shyǵaryldy. Sonymen qatar 54 jeke jáne zańdy tulǵa, onyń ishinde Brazılııanyń 2 azamatyn zańsyz jumysqa tartqan fırmalardyń biriniń basshylyǵy ákimshilik jaýapkershilikke tartyldy», dedi Almaty qalasy PD kóshi-qon qyzmeti basqarmasynyń bastyǵy Ashat Býtýnchınov.
Aıta ketsek, Qazaqstan Respýblıkasynyń kóshi-qon zańnamasyn saqtaý boıynsha reıdter quqyq buzýshylyqtyń aldyn alýǵa jáne zańsyz kóshi-qon arnalaryn anyqtaýǵa baǵyttalǵan. Reıdtik is-sharalardyń maqsaty – qoǵamdyq tártipti saqtaý, Qazaqstan Respýblıkasynda bolý erejelerin buzý derekterin jáne sheteldikterdi zańsyz jumysqa ornalastyrý derekterin anyqtaý, sondaı-aq shetel azamattary tarapynan qylmystar men quqyq buzýshylyqtardyń aldyn alý.