Ekologııa jáne tabıǵı resýrstar mınıstrligi Qazaqstan boıynsha úı janýarlaryn esepke alý erejeleri 1 qyrkúıekten bastap kúshine enetindigi týraly habarlady, dep jazady Egemen.kz.
Ereje ıtter men mysyqtardy mindetti túrde esepke alýdy kózdegen. Úı janýarlaryn esepke alýdy jergilikti atqarýshy organdar qurǵan memlekettik veterınarııalyq uıymdar, veterınarııa salasynda emdeý-profılaktıkalyq kásipkerlik qyzmetpen aınalysatyn jeke nemese memlekettik emes zańdy tulǵalar júzege asyrady.
Úı janýarlaryn esepke alý jónindegi aqparattyq júıeni jergilikti atqarýshy organ ózi aıqyndaǵandyqtan azamattar suraqtar boıynsha jergilikti ákimdikke júgine alady.
Esepke alý normalaryn buzǵan jaǵdaıda «Ákimshilik quqyq buzýshylyq týraly» kodekstiń 407-2-babynda tıisti aıyppul salý isi kózdelgen.