Túrkistannyń balyq ósirýshileri óz ónimderin shetelge eksporttap jatyr. Oblysta balyq sharýashylyǵy damyp kele jatqan aýmaqtyń biri - Jetisaı aýdany, dep habarlaıdy Egemen.kz.
Jetisaı aýdanynyń Maqtaly aýyldyq okrýgine qarasty Sholpanqudyq shaǵyn aýylynda ornalasqan «Dımash» sharýa qojalyǵynyń tóraǵasy Súndet Abylaev 20 mln teńge jeke qarjysyn óziniń balyq sharýashylyǵyna salyp, dóńmańdaı, amýr, sazan sekildi balyq túrleriniń 1 mln 300 myń dana shabaǵyn alyp kelgen eken. Uzyndyǵy - 250 metr, eni - 180 metr bolatyn 3 basseınde ósirilip jatqan balyqtardyń ortasha salmaǵy - 1,5 keli. Balyqtarǵa qajetti jemdi Polsha elinen aldyrady eken. Mamandardyń aıtýynsha, shekara asyp keletin jemniń quramynda balyqty túrli aýrý-syrqaýdan saqtaıtyn jáne ósip-jetilýine qajetti barlyq mıneraldar bar.
Oblys ákiminiń baspasóz qyzmeti usynǵan aqparatqa sáıkes, elimiz boıynsha jasandy balyq ósirýden kósh bastap turǵan Túrkistan oblysynda 104 sý aıdyny bar. Olardan bólek 4 halyqaralyq, 4 respýblıkalyq mańyzy bar kásipshilik maqsattaǵy ýchaskeler bekitilgen. Taýarly balyq ósirýmen 156 kásipkerlik mekeme aınalysady. Oblys turǵyndaryn balyq ónimderimen tolyq qamtamasyz etý maqsatynda 30 toǵandy balyq sharýashylyǵy, onyń ishinde 4-eýi úıirgelik aýlada ashylǵan eken.
«Memleket basshysy Qasym-Jomart Kemeluly aýyl sharýashylyǵyn damytpaı básekege qabiletti ekonomıka qurý múmkin emestigin atap, onyń ishinde balyq sharýashylyǵyna da erekshe mán berýdi tapsyrǵan edi. Nátıjesinde, memleket tarapynan akvaósirýge paıdalanylatyn azyqty satyp alýǵa jumsalatyn shyǵyndardy sýbsıdııalaý baǵdarlamasy balyq sharýashylyǵyn damytýǵa ońdy yqpalyn tıgizip keledi», dedi Jetisaı aýdanynyń ákimi Serik Mamytov.
Memlekettik qoldaýdan qalys qalmaǵan Túrkistan oblysynyń balyq óndirýshileri ónimderin Ázerbaıjan, Grýzııa, Izraıl, Reseı, Qytaı jáne О́zbekstan elderine eksporttap, tabystaryn arttyryp jatyr.