Astanada «Semeı polıgony: adamdar men taǵdyrlar, sheshý joldary» taqyrybynda dóńgelek ústel ótti, dep habarlaıdy Egemen.kz elorda ákimdiginiń resmı saıtyna silteme jasap.
Qalalyq Ishki saıasat basqarmasy uıymdastyrǵan jıynǵa Astana qalasynyń qoǵamdyq keńesi músheleri, máslıhat depýtattary men úkimettik emes uıymdar jáne BAQ ókilderi qatysty.
«1991 jyldyń 29 tamyzynda álemde Nevada polıgonynan keıingi kólemi jaǵynan ekinshi orynda turǵan Semeı ıadrolyq polıgonynyń jabylýy týraly jarlyqqa qol qoıyldy. Bul kezdesýde osy tarıhı oqıǵany eske alyp, talqylaý úshin jınalyp otyrmyz», dedi Astana qalasy Ishki saıasat basqarmasy basshysynyń orynbasary Lázzat Qusaıynova.
Budan soń dóńgelek ústel basyna jınalǵandar Semeı polıgony zardabynan qaza bolǵandardy 1 mınýt únsizdikpen eske aldy. Ári qaraı «Semeı ıadrolyq polıgony» qoǵamdyq qorynyń gımnin tyńdap, atqarylǵan ister týraly beınebaıandy tamashalady.
Alǵashqy sóz kezegin alǵan «Semeı ıadrolyq polıgony» qoǵamdyq qorynyń tóraǵasy Ábdikárim Bolatbek polıgonnan zardap shekkenderdiń jaǵdaıy týraly baıandady. Astana qalasy qoǵamdyq keńesiniń múshesi Kárimbek Qurmanálıev, «QR Semeı ıadrolyq synaq polıgony erekshe táýekel etýshiler bóliminiń ardagerleri men múgedekteriniń qaýymdastyǵy» zańdy tulǵalar birlestiginiń basshysy Erjan Dúısenbaevtar óz oılaryn ortaǵa saldy.