Prezıdent Qasym-Jomart Toqaev Qazaqstan halqyna Joldaýynda aýyl sharýashylyǵy salasynyń áleýeti jaıynda aıtty, dep habarlaıdy Egemen.kz.
«Aldymyzda taǵy bir óte mańyzdy mindet tur. Biz agroónerkásip kesheninde naqty serpilis jasaýymyz kerek. Aýyl sharýashylyǵy salasynyń áleýeti orasan zor. Biraq biz qolda bar múmkindikterdi áli de tolyq paıdalanbaı otyrmyz. Qazaqstannyń aınalasynda ónim ótkizetin óte úlken naryqtar bar. Onda sapaly azyq-túlik ónimderi tapshy. Qazaqstannyń strategııalyq maqsaty – Eýrazııa qurlyǵyndaǵy basty agrarlyq ortalyqtyń birine aınalý. Osy maqsatqa qol jetkizemiz desek, eń aldymen, ónimdi joǵary deńgeıde óńdeýge kóshýimiz qajet. Onsyz bolmaıdy», dedi Memleket basshysy.
Qasym-Jomart Toqaev aldaǵy úsh jyl ishinde agroónerkásiptegi óńdelgen ónim úlesin 70 paıyzǵa jetkizý kerek ekenin aıty. Bul – naqty mindet.
«Jurtty ónim óńdeýge yntalandyrý kerek. Ol úshin salyq saıasatyn qaıta qaraý qajet. Bul salada iri kompanııalar kóbirek bolsa, naqty serpilis jasaýǵa bolady. Biz eksportty ulǵaıta otyryp, ishki naryqty da ustap turýymyz kerek. Sondyqtan elimizge sapaly ónimdi qajetti kólemde turaqty usyna alatyn kásiporyndar qajet. Otandyq agrofırmalardyń iri kompanııalar qataryna kirgeni jón bolar edi. Sondaı-aq ózara tıimdi sharttardy usynyp, bul jumysqa halyqaralyq korporasııalardy belsendi túrde tartý kerek», dedi ol.
Onyń aıtýynsha, et, sút, astyq ónimderin tereń óńdeý jáne óndiristik jylyjaı sharýashylyqtaryn damytý sııaqty el úshin bolashaǵy zor baǵyttarǵa basymdyq bergen abzal. Sonymen birge elimizdegi aýyl sharýashylyǵy kásiporyndarynyń áleýetin qaperden shyǵarmaǵan jón. Osy rette Prezıdent 100-den astam iri sút-taýar fermasy salynyp jatqan Soltústik Qazaqstan oblysynyń jetistikterin atap ótti.«Sharýalardyń tájirıbesi mol, jem-shóp qory da jetkilikti. Oǵan qosa baıypty qoldaý sharalary qolǵa alynǵan. Osynyń bári tutasa kele táp-táýir nátıje berip otyr. Qus fabrıkalaryn, kókónis qoımalaryn, et ónimderin shyǵaratyn kásiporyndar salǵan kezde osy tájirıbeni basshylyqqa alý kerek», dedi Q.Toqaev.