Memleket basshysy Qasym-Jomart Toqaev Qazaqstan halqyna arnaǵan Joldaýynda birqatar ózekti máselelerdi atap, túıinin tez arada sheshýdi tapsyrdy.
Memleket basshysynyń búgingi joldaýynda eldegi saıası reformalar qorytyndylanyp, aldaǵy kezeńde iske asyratyn keshendi ekonomıkalyq jáne áleýmettik reformalarǵa qajetti is-qımyl jospary tanystyryldy. Ekonomıka salasynda júrgen mamandar, kásipkerler, óndiris ortasy osyndaı mazmundaǵy joldaýdy kópten kútkeni ras. Sonyń ishinde elimizdegi ındýstrııa salalaryn qazirgi zaman talaptaryna saı ilgeri damytýdyń qadamdary, sý, jer qatynastaryn retteý, ınfraqurylymdyq qaýipsizdik máselesi, jıilep ketken tehnogendi apattar men qaýip-qaterdiń aldyn alý, olardan keletin shyǵyndy azaıtý, eń bastysy, el qaýipsizdigin jańasha baǵalaý, soǵan qajetti naqty sharalar qabyldaý reti aıqyndaldy.
Taǵy bir mańyzdy baǵyt – memleket pen kásipkerler arasyndaǵy jańa deńgeıdegi qarym-qatynas. Kásipkerlikti qoldaý, qajet deseńizder, qorǵaý da qajet. Memleket pen quqyq qorǵaý oryndarynyń retsiz, orynsyz aralasýyn tejeý, ekonomıkalyq qylmystardy tek ekonomıkalyq salada qarastyrý, kásipkerlerge erkindik berý jáne olardyń belsendiligin arttyrýǵa kómektesý asa mańyzdy. Osy máseleler kópten beri alǵash ret aıtylyp, memlekettik organdarǵa tıisti baǵyt-baǵdar berildi. Munyń barlyǵy – eldiń ál-aýqatyn kóterýge qajetti ekonomıka jáne áleýmettik saladaǵy iske asýy tıis reformalardyń, ózgeristerdiń óte jaqsy bastamasy.
Sondyqtan Memleket basshysynyń bul joldaýyn yqylaspen qabyldadyq. Aıtylǵan mindetterdi iske asyrýǵa óz tarapymyzdan úles qosýǵa daıynbyz.
Taǵy atap aıtarlyǵy, sıfrlandyrýdy el Prezıdenti óziniń qadaǵalaýyndaǵy mańyzdy baǵyt ekenin basa eskertti. Ekonomıka jáne áleýmettik saladaǵy sıfrlyq sheshimderdiń Qazaqstan azamattarynyń kúndelikti ómirin jeńildetýge baǵyttalýy qajettigi, osy baǵytta iske asýy tıis naqty is-sharalar kesheni belgilendi.
Munyń bári kókeıdegi úmitti arttyrady. Bolashaqqa degen senimdi kúsheıtedi.
Raýan KENJEHANULY,
Halyqaralyq «Qazaq tili» qoǵamynyń prezıdenti