Búgin, 1 qyrkúıekte Qosshy qalasynda 1 500 jáne 1 200 orynǵa arnalǵan 2 jańa mektep esigin aıqara ashyp, oqýshylardy jyly qarsy aldy, dep habarlaıdy Egemen.kz janabastau.kz-ke silteme jasap.
Jańa mekteptiń ashylý saltanatyna Aqmola oblysynyń ákimi Ermek Marjyqpaev, Oqý-aǵartý mınıstri Ǵanı Beısembaev, Qosshy qalasynyń ákimi Gaıdar Qasenov, «Vernyı Kapıtal» ınvestısııalyq tobynyń bas dırektory Erlan Ospanov, «Bolat О́temuratov» qory Qamqorshylyq keńesiniń tóraǵasy Almas Sharman jáne basqa da resmı qonaqtar, ata-analar qatysyp, júrekjardy tilekterin aıtty.
Jeke ınvestısııa esebinen salynǵan 1 500 oryndyq mektep-gımnazııanyń ashylý saltanatynda sóz sóılegen Ermek Marjyqpaev Memleket basshysynyń tapsyrmasymen bıylǵy jyly óńirde 10 mekteptiń qurylysy bastalǵanyn, olardyń deni 2024 jyly paıdalanýǵa beriletinin qýana aıtty. Jańa bilim ordalary Astana qalasynyń mańyndaǵy Arshaly, Selınograd, Shortandy aýdandary jáne Qosshy qalasynda ashylady dep kútilýde.
«Qosshy qalasynda turǵyndar sany jedel ósýine baılanysty mektep tapshylyǵy týyndap, balalardy úsh aýysymmen oqytýǵa týra keldi. Bul problemany sheshý úshin 2022 jyly 1200 oryndyq bir jańa mektep ashyldy. Endi mine ekeýiniń qurylysy aıaqtalyp, paıdalanýǵa berilip jatyr. Sondaı-aq, «Jaıly mektep» ulttyq jobasy aıasynda 2024-2025 jyldar kezeńinde 3 mektep salý josparlanǵan. Bul bilim oshaqtaryndaǵy shamadan tys júktemeni azaıtyp, úsh aýysymdyq oqý júıesin joıýǵa septigin tıgizdi», dedi oblys ákimi.
Aıta keteıik, bıyl memlekettiń qoldaýymen respýblıka boıynsha 130 myń oqýshyǵa arnalǵan 154 mektep paıdalanýǵa berilmekshi. Onyń 55 myń oqýshyǵa arnalǵan 39 mektebi 1 qyrkúıekte esigin aıqara ashty.
«Búgingi kúni Qazaqstan boıynsha 3 mıllıon 9 myń oqýshy alǵash ret mektep tabaldyryǵyn attap, sizdermen birge toılap jatyr desek bolady. Onyń ishinde 400 myńǵa jýyq búldirshin 1 synypqa barsa, 18 myńnan astam 11 synypty bitirmekshi. Qurmetti ustazdar, oqýshylar, ata-analar sizderdi bilimniń alǵashqy kúnimen shyn júrekten quttyqtaýǵa ruqsat etińizder. Sizderdiń shákirtterińiz úmitterińizdi aqtap, osy bilim oshaǵynan el tizginin ustar eldiń azamattary bolyp shyǵýyna shyn júrekten tilektespin», dedi Oqý-aǵartý mınıstri Ǵanı Beısembaev.
Aıta ketsek, Memleketimiz bilim salasyna únemi qoldaý kórsetip otyrady. Sonyń aıqyn aıǵaǵy – «Jaıly mektep» ulttyq jobasy sheńberinde elimizde buryn-sońdy bolmaǵan jańalyq – 400 jańa úlgidegi mekteptiń qurylysy. Onyń 200-den astamynyń qurylysy qazirdiń ózinde júrgizilip jatyr. Munyń bári memleketimizdegi apatty jáne úsh aýysymdyq mektepterdiń máselesin sheshýge baǵyttalǵan.
Sondaı-aq búgin Qosshy qalasynda 1 200 oryndyq taǵy bir mektep ashyldy. Mekteptiń jalpy aýdany - 20357 myń sharshy metr. Ǵımarat 3 qabattan, 6 bloktan turady. Oqý kabınetteriniń sany - 50. Hımııa, fızıka, bıologııa, tehnologııa kabınetteri, qajetti jıhazben tolyqtaı jabdyqtalǵan. 384 oryndyq ashana, 600 oryndyq akt zaly, aýdany 520 sharshy metr sport zaly, metal, aǵash, mata óńdeý sheberhanalary, alǵashqy áskerı daıyndyq kabıneti bar.
Jalpy, 2023-2024 oqý jylynyń basynda Qosshy qalasy boıynsha mektepke 10 809 oqýshy bardy. Birinshi synyp oqýshylarynyń sany –1321, onyń ishinde jeke mektepte – 77, Taıtóbedegi mektepte – 71.