Senattyń Qarjy jáne bıýdjet komıtetiniń depýtattary keńeıtilgen otyrys ótkizip, Qazaqstan men Túrkııa arasyndaǵy kedendik baqylaý rásimderin jeńildetý týraly zańdy talqylady, dep habarlaıdy Egemen.kz Senattyń baspasóz qyzmetine silteme jasap.
«Qazaqstan Respýblıkasynyń Úkimeti men Túrkııa Respýblıkasynyń Úkimeti arasyndaǵy aqparat almasýdy uıymdastyrý jáne kedendik baqylaý rásimderin ońaılatý týraly kelisimdi ratıfıkasııalaý týraly» Zańy kedendik baqylaýdy júrgizýdiń tıimdiligin arttyrýǵa jáne merzimin qysqartýǵa baǵyttalǵan.
«Kelisim ótkizý pýnktterinde shekarany kesip ótýdiń tártibin, kedendik baqylaýdy júrgizý ýaqytyn qysqartý maqsatynda kedendik resimdeýdi jeńildetýdi, salalarda quqyq buzýshylyq belgileri bolǵan jaǵdaılardy qospaǵanda, ótkizý pýnktterinde kedendik tekserýden bosatýdy kózdeıdi», delingen habarlamada.
Komıtet otyrysynda senatorlar Kelisimdi ratıfıkasııalaý kedendik rásimderdi ońaılatýǵa jáne ońtaılandyrýǵa, syrtqy ekonomıkalyq qyzmetke qatysýshylar úshin qolaıly jaǵdaılar jasaýǵa yqpal etetin aıtty. Bul óz kezeginde júk tasymaldaýshylar úshin yńǵaıly bolmaq.