Premer-mınıstr Álıhan Smaıylov Jambyl oblysynyń barlyq deńgeıdegi máslıhattary depýtattarynyń jınalysyna qatysý úshin Taraz qalasyna bardy, dep habarlaıdy Egemen.kz Úkimettiń baspasóz qyzmetine silteme jasap.
Jınalysta Álıhan Smaıylov Memleket basshysynyń óńir ákimi laýazymyna Nurbol Júnisbekov jáne Erbol Qarashókeevtiń kandıdatýrasyn qaraýǵa usyný týraly hatyn oqydy. Ashyq daýys berý qorytyndysy boıynsha 142 depýtat Erbol Qarashókeevtiń kandıdatýrasyn qoldaǵan. 47 depýtat N. Júnisbekovti qoldap daýys bergen. Daýys berýge barlyǵy 189 depýtat qatysty.
Aıta keteıik, Memleket basshysynyń Jarlyǵymen Erbol Shyraqpaıuly Qarashókeev Jambyl oblysy ákimi laýazymyna taǵaıyndaldy.
Oblys aktıvine jańa ákimdi tanystyra otyryp, Álıhan Smaıylov qazirgi ýaqytta óńirdiń qurylys, ónerkásip jáne aýyl sharýashylyǵy salalarynda oń dınamıka baıqalyp otyrǵanyn atap ótti.
«Oblysta shaǵyn jáne orta bıznespen birge iri ınvestısııalyq jobalar qarqyndy júzege asyrylýda. Birneshe iri áleýmettik nysan salynyp, paıdalanýǵa berilýde», dedi Úkimet basshysy.
Sonymen qatar Premer-Mınıstr Úkimet óńirlerde azamattardyń ómir súrý sapasyn arttyrý jónindegi sharalardy iske asyrýdy jalǵastyryp jatqanyn atap ótti. Atap aıtqanda, ákimdikterge salyqtardy paıdalaný turǵysynan qosymsha ókilettikter beriletin bolady.
«Bıýdjetti basqarý prosesi budan da ıkemdi bolmaq. Tıisti ózgerister jańa Bıýdjet kodeksiniń jobasynda qarastyrylǵan», dedi Álıhan Smaıylov.
Úkimet basshysy óńirdegi jumystyń basym baǵyttarynyń biri halyq pen aýyl sharýashylyǵyn sýmen qamtamasyz etý ekenin atap ótti. Osyǵan baılanysty ırrıgasııalyq jelilerdi salý, sý sharýashylyǵy nysandaryn kúrdeli jóndeý jáne jańa sýarmaly jerlerdi iske qosý jóninde sharalar qabyldaý, sondaı-aq sý únemdeý tehnologııalaryn belsendi túrde engizý talap etiledi.
Sondaı-aq Premer-Mınıstr Úkimet Jas órkendegi gıdroquraldy jańǵyrtýǵa qajetti qarajat bólgenin eske saldy.
«Kelesi jyly 3 iri sý qoımasyn salýǵa bıýdjette tıisti qarajatty kózdedik. Sondaı-aq jergilikti bıýdjet esebinen shaǵyn sý qoımalaryn salý kerek. Aralyq kezeńde sýdy jınaýymyz kerek», dep atap ótti Premer-Mınıstr.
Taǵy bir mańyzdy baǵyt – turaqty jumyspen qamtamasyz etý. Buǵan qazirgi naqty jaǵdaıdy eskere otyryp qabyldanǵan Halyqtyń tabysyn arttyrý baǵdarlamasy aıtarlyqtaı yqpal etedi.
Sonymen qatar óńirde óziniń ekonomıkalyq jáne áleýmettik tıimdiligin dáleldegen «Aýyl amanaty» baǵdarlamasyn iske asyrý jalǵasýda.
Álıhan Smaıylov atap ótkendeı, óńir ekonomıkasyn ári qaraı ártaraptandyrý óte mańyzdy. Máselen, jańa iri ınvestısııalyq jobalardy iske asyrý arqyly jańa jumys oryndaryn ashý kerek.
Ol oblystyń hımııa ónerkásibiniń áleýeti zor ekenin, sondyqtan iri hımııalyq keshen men «Taraz hımııalyq parki» arnaıy ekonomıkalyq aımaǵyn odan ári damytýdy qamtamasyz etý kerektigin aıtty.
Sonymen qatar Úkimet basshysy agroónerkásip keshenindegi ónimdi qaıta óńdeý úlesin arttyrýdyń, onyń ishinde Soltústik Qazaqstan oblysynyń sút-taýarly fermalardy iske qosý tájirıbesin paıdalaný arqyly, sondaı-aq avtojoldardy salý jáne kúrdeli jóndeý arqyly kólik-logıstıkalyq áleýetti júzege asyrýdyń mańyzdy ekenin atap ótti.
Áleýmettik ınfraqurylymdy damytýǵa qatysty Álıhan Smaıylov «Jaıly mektep» ulttyq jobasy aıasynda Jambyl oblysynda 6,5 myń balaǵa arnalǵan jańa formattaǵy 7 bilim berý mekemesin salý josparlanǵanyn eske saldy. Bul oqýshy oryndarynyń tapshylyǵyn, úsh aýysymmen oqytýdy jáne tozyǵy jetken mektepter máselesin sheshýge múmkindik beredi.
«Oblystyń jańa ákimi men barlyq jergilikti atqarýshy organ ókilderine Memleket basshysy alǵa qoıǵan mindetterdi oryndaýda tabys tileımin», dep túıindedi sózin Álıhan Smaıylov.