Elimizde qyrkúıek aıynan bastap resmı túrde shomylý maýsymy aıaqtaldy. Sýǵa túsý aralyǵy úsh aıdy qurap, 1 maýsymnan bastap 31 tamyzǵa deıin sozyldy.
Tótenshe jaǵdaılar mınıstrliginiń habarlaýynsha, jaz mezgilinde qutqarýshylar sýǵa batqan 136 adamdy, onyń ishinde 51 balanyń ómirin arashalap qaldy. Bul mınıstrliktiń mamandary jaz bastalmas buryn jáne maýsym kezinde de profılaktıkalyq jumystar júrgizip, azamattarǵa sýdaǵy qaýipsizdik erejelerin saqtaýdy túsindirdi.
Biraq barlyq jerde júrgizilgen jumystarǵa qaramastan, jazdyń úsh aıynda 177 adam, onyń ishinde 53 kámeletke tolmaǵandar sýǵa batyp ketti. Salystyrmaly túrde aıtsaq, ótken jylǵy shomylý maýsymynda 184 adam sýǵa batyp ketti, sonyń ishinde 62-si kámeletke tolmaǵan edi.
Bıyl sýǵa batqandardyń 98 paıyzy jabdyqtalmaǵan jaǵajaılarda shomylǵan. Sýdaǵy ólimniń negizgi sebepteri – óz kúshin asyra baǵalaý, mas kúıinde sýǵa túsý, júze almaý. Al balalardyń sýǵa batýynyń basty sebebi – olardy eresekterdiń qaraýsyz qaldyrýy.
Jalpy, respýblıka boıynsha sýda jappaı demalýǵa ruqsat etilgen 612 oryn bar. 4 285 oryn sýǵa túsýge qaýipti dep tanylyp, sýǵa túsýge tyıym salynǵan oryndar tizimine engizilgen. Tyıym salynǵan jáne ruqsat etilgen shomylý aımaqtary týraly derekter 2GIS platformasynda ornalastyrylǵan.