Jambyl oblysy, Merki aýdanynda Kenesary hanǵa arnalǵan eskertkish boı kóterdi. Tarıhı mura Merkiniń mádenıet kúni jáne 95 jyldyǵyna oraı ashylyp otyr, dep habarlaıdy Egemen.kz aýdan ákiminiń baspasóz qyzmetine súıenip.
Ákimdiktiń málimetinshe, tarıhı tulǵaǵa arnalǵan músin «Batys Eýropa-Batys Qytaı» dáliziniń boıynda ornalasqan.
«Eskertkishtiń ashylý saltanatynda Memlekettik Ánuran shyrqalyp, M.Áýezovtiń «Han Kene» teatrlandyrylǵan qoıylymy sahnalandy. Saltanatty sharaǵa qoǵam qaıratkeri Rahmatildá Rahmanberdıev, Jambyl oblysy ákimi apparatynyń basshysy Mádı Máten jáne aımaqtyń zııaly qaýym ókilderi qatysty. Jınalǵan qaýym eskertkishke gúl shoqtaryn qoıyp, batyr baba rýhyna taǵzym etti. Eskertkish jobasynyń oryndaýshysy – merkilik músinshi Temirhan Kóljigit.
Eskertkishtiń jalpy bıikti 10 metrdi quraıdy, onyń ishinde tuǵyry – tastan, músinniń negizgi bóligi mystan jasalǵan», delingen habarlamada.